Qanlı Yanvar Azərbaycanın müstəqilliyinin bərpasına aparan yolun başlanğıcıdır
Bakı, 20 yanvar, AZƏRTAC
20 Yanvar Azərbaycanın müstəqilliyinin bərpasına aparan yolun başlanğıcıdır. Ona görə də faciə qurbanlarının xatirəsi daim dərin hörmət və ehtiramla yad olunur.
Bu sözləri AZƏRTAC-a müsahibəsində “Dövlət və qanun” jurnalının baş redaktoru Yasəmən Möhübbətqızı söyləyib.
O bildirib ki, o günlərdə öz azadlığı uğrunda mübarizə aparan xalqa qarşı ağır faciə törədildi. Qanlı Yanvar hadisələrindən sonra xalqımızın azadlıq mübarizəsi daha da möhkəmləndi. Xalqımız şəhidlərimizin qanı bahasına azadlığa qovuşdu.
“20 Yanvar hadisələri keçmiş SSRİ rəhbərliyinin, həmçinin o vaxtkı yerli hakimiyyətin xəyanətkarlığı nəticəsində başımıza gətirildi. Xalqını bu ağır günlərdə tək qoymayan Heydər Əliyev Azərbaycanın Moskvadakı daimi nümayəndəliyinə gələrək bu qanlı qırğını pisləyən tarixi bəyanatla çıxış etdi”, - deyə Yasəmən Möhübbətqızı vurğulayıb.
Yasəmən Möhübbətqızı bildirib ki, tariximizin həm qanlı, həm də qəhrəmanlıq səhifəsi olan 20 Yanvar yaddaşımızdan silinməyəcək. O müdhiş gecədə şəhid olan Vətən övladlarının xatirəsi daim əziz, müqəddəs tutulacaq.
Bölmənin digər xəbərləri
