Qanunsuz ov edən əcnəbi vətəndaşlar cəzalandırılıblar
Bakı, 21 oktyabr, AZƏRTAC
Dövlət Ekoloji Təhlükəsizlik Xidmətinin əməkdaşları tərəfindən keçirilən növbəti nəzarət tədbirləri zamanı Biləsuvar rayonu ərazisində qanunsuz ov edən əcnəbi vətəndaşlar saxlanılıblar.
Xidmət rəsmisi Bəhruz Məhəmmədov AZƏRTAC-a bildirib ki, təqsirkarların 99-UL-996 dövlət nömrə nişanlı “Toyota” markalı nəqliyyat vasitəsinə keçirilən baxış zamanı avtomobildən ovlanmış 4 çobanaldadan quşu aşkar edilərək götürülüb: “Araşdırma zamanı qanunsuz ov edənlərin Birləşmiş Ərəb Əmirliklərinin vətəndaşları Raşed Qareeb Raşed Darviş Almansoori, İbrahim Qareeb Raşed Darviş Almansoori, Mohamed Raşed Qareeb Raşed Almansoori olduğu müəyyən edilib və hər biri 2 min manat məbləğində cərimələnib”.
Xidmət rəsmisi xarici ölkə vətəndaşları barəsində qanunamüvafiq tədbir görülməsi ilə bağlı Dövlət Miqrasiya Xidmətinə məktub hazırlandığını bildirib.
Bölmənin digər xəbərləri
