Qarabağ bölgəsində fəaliyyət göstərən jurnalistlərlə görüş keçirildi
Bərdə, 22 iyul (AZƏRTAC). İyulun 22-də Milli Mətbuat Günü münasibətilə Bərdə Rayon İcra Hakimiyyətində Qarabağ bölgəsində fəaliyyət göstərən kütləvi informasiya vasitələrinin nümayəndələri ilə görüş keçirildi.
AZƏRTAC xəbər verir ki, tədbirdə çıxış edənlər Azərbaycanda milli mətbuatın yaranmasının ildönümü münasibətilə media işçilərini təbrik etdilər, milli mətbuatımızın zəngin və şərəfli yoluna nəzər salındı. Azərbaycan müstəqillik əldə etdikdən sonra mətbuat sahəsində əldə olunan uğurlardan danışan natiqlər söz və mətbuat azadlığının, demokratik mühitin bərqərar olunmasında ulu öndər Heydər Əliyevin əvəzsiz xidmətlərini xüsusi vurğuladılar.
Bildirildi ki, ölkəmizdə KİV-lərin əlavə dəyər vergisindən, “Azərbaycan” nəşriyyatına olan borclarından azad edilməsi, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun yaradılması, media sahəsində çalışanlara müxtəlif yardımlar edilməsi, mənzil şəraitinin yaxşılaşdırılması üçün həyata keçirilən tədbirlər mətbuata dövlət tərəfindən göstərilən diqqət və qayğının bariz nümunəsidir.
Çıxış edən mətbuat nümayəndələri görüşün təşkilinə görə rayon rəhbərliyinə minnətdarlıqlarını bildirdilər.
Sonda KİV nümayəndələrinə hədiyyələr təqdim edildi.
Bölmənin digər xəbərləri
