QARABAĞ MÜHARİBƏSİ ƏLİLİNƏ YENİ MƏNZİL VERİLMİŞDİR
AZƏRTAC-ın müxbiri xəbər verir ki, sağlamlığını torpaqlarımızın ərazi bütövlüyü uğrunda mübarizədə itirərək ikinci qrup əlil olmuş Samux rayon sakini Mehman Qurbanov yeni ili yeni mənzildə qarşılayacaqdır. Mənzilin açarlarının təqdim olunması münasibətilə keçirilən mərasimdə Əmək və Əhalinin Sosial Müdafiəsi Nazirliyinin şöbə müdiri Əli Axundov qeyd etmişdir ki, cari ilin ötən dövrü ərzində nazirlik tərəfindən Qarabağ müharibəsi əlillərinə və şəhid ailələrinə təxminən min yeni mənzil verilmişdir. 1510 nəfərə, o cümlədən 9 samuxluya “OKA” markalı avtomaşın hədiyyə edilmişdir. Hazırda rayonda əlil və şəhid ailələri üçün tikilən ikimərtəbəli 8 mənzilli binada son tamamlama işləri görülür.
Mehman Qurbanov və ailə üzvləri onlara göstərilən diqqət və qayğıya görə Prezident İlham Əliyevə minnətdarlıqlarını bildirmişlər. Sonda rayonun imkanlı şəxsləri yeni mənzil sahibinə məişət əşyaları bağışlamışlar.
Bölmənin digər xəbərləri
