İdeoloji təhlükəsizlik: yeni mərhələnin yeni çağırışı - ŞƏRH
Bakı, 8 oktyabr, AZƏRTAC
Prezident İlham Əliyevin Yeni Azərbaycan Partiyasının VIII Qurultayında səsləndirdiyi fikirlər Azərbaycanın yeni tarixi mərhələsində ideoloji təhlükəsizliyin və informasiya siyasətinin əhəmiyyətini bir daha ortaya qoydu. Dövlətimizin başçısının diqqət çəkdiyi əsas məsələlərdən biri ideoloji işin müasir dövrün tələblərinə uyğun qurulması, şablon yanaşmalardan uzaqlaşılması və Azərbaycanın həqiqətlərinin cəmiyyətə daha effektiv şəkildə çatdırılmasıdır. Bu yanaşmanın arxasında mühüm reallıq dayanır. Azərbaycan artıq ərazi bütövlüyünü və dövlət suverenliyini tam bərpa etmiş ölkə kimi yeni mərhələyə qədəm qoyub. Belə bir mərhələdə milli dövlətçilik düşüncəsinin möhkəmləndirilməsi, əldə edilmiş tarixi nəticələrin qorunması və gələcək nəsillərə düzgün ötürülməsi xüsusi əhəmiyyət kəsb edir. Bu prosesdə ideoloji təhlükəsizlik hərbi, iqtisadi və siyasi təhlükəsizlik qədər mühüm istiqamətə çevrilir.
Bu sözləri AZƏRTAC-a açıqlamasında politoloq Tural İsmayılov söyləyib.
O bildirib ki, müasir dünyada informasiya məkanı dövlətlərin qarşılaşdığı əsas rəqabət meydanlarından biridir. Sosial şəbəkələr, rəqəmsal platformalar və süni intellekt texnologiyaları informasiyanın yayılma imkanlarını genişləndirdiyi kimi, manipulyasiya və saxta məlumatların təsir imkanlarını da artırıb. Ona görə də cəmiyyətin informasiya savadlılığının yüksəldilməsi və insanlarda doğru məlumatı yanlışdan ayırmaq bacarığının formalaşdırılması, sadəcə, media məsələsi deyil, milli təhlükəsizlik məsələsidir. Prezidentin təhsil və savadlılığı ideoloji təxribatlara qarşı mühüm vasitələrdən biri kimi önə çəkməsi məhz bu baxımdan diqqətəlayiqdir.
Burada ideoloji işin forma və məzmununun yenilənməsi məsələsi də xüsusi əhəmiyyət daşıyır. Müasir auditoriyaya köhnə kommunikasiya üsulları ilə müraciət etmək mümkün deyil. İnsanların informasiya qəbul etmək vərdişləri dəyişib, xüsusilə gənc nəsil informasiyanı daha çox sosial media, video platformalar və rəqəmsal resurslar üzərindən əldə edir. Deməli, dövlətçilik, milli maraqlar və Azərbaycanın inkişaf yolu ilə bağlı mesajların da bu reallığa uyğun formada təqdim edilməsi zəruridir. Əslində, Prezidentin “şablonlardan imtina” çağırışı ideoloji işin mahiyyətinə yeni baxış tələb edir. İdeoloji fəaliyyət daha çox fakt, məzmun, analitika və düzgün kommunikasiya üzərində qurulmalıdır.
“Azərbaycanın bu sahədə mühüm üstünlüyü isə real nəticələrin mövcudluğudur. Ölkənin son illərdə əldə etdiyi siyasi, iqtisadi və hərbi nailiyyətlər, ərazi bütövlüyünün və suverenliyin təmin olunması, beynəlxalq mövqelərinin möhkəmlənməsi ideoloji fəaliyyət üçün möhkəm faktoloji baza yaradır. Bu reallıqları süni şəkildə şişirtməyə və ya əlavə miflər yaratmağa ehtiyac yoxdur. Əsas vəzifə mövcud həqiqətləri düzgün, ardıcıl və müasir kommunikasiya vasitələri ilə təqdim etməkdir. Bu baxımdan, media institutlarının üzərinə də mühüm məsuliyyət düşür. Peşəkar jurnalistika yalnız xəbəri çatdırmaqla kifayətlənməməli, cəmiyyətə baş verən proseslərin mahiyyətini izah etməlidir. Analitik media, rəqəmsal kontent, infoqrafika, videomateriallar və yeni texnologiyalar Azərbaycanın həqiqətlərinin həm daxili, həm də beynəlxalq auditoriyaya çatdırılmasında daha fəal istifadə olunmalıdır. Xüsusilə süni intellekt dövründə bu məsələ daha aktualdır”, - deyə T.İsmayılov vurğulayıb.
Politoloq əlavə edib ki, Prezidentin VIII Qurultayda səsləndirdiyi fikirlər bu baxımdan yalnız YAP qarşısında dayanan vəzifələrin müəyyənləşdirilməsi kimi qiymətləndirilməməlidir. Burada Azərbaycanın yeni mərhələdə ideoloji və informasiya təhlükəsizliyinə yanaşmasının mühüm istiqamətləri müəyyənləşdirilir. Ərazi bütövlüyünü və suverenliyini bərpa etmiş Azərbaycanın qarşısında indi bu tarixi nəticələri qorumaq, milli dövlətçilik düşüncəsini daha da möhkəmləndirmək və əldə olunan nailiyyətləri gələcək nəsillərə düzgün ötürmək vəzifəsi dayanır. Bu isə ideoloji işin də yeni keyfiyyət mərhələsinə keçməsini tələb edir.
Bölmənin digər xəbərləri
