İstanbulda çökən binanın dağıntıları altından 1 nəfərin meyiti tapılıb, 3 nəfərin axtarışları davam edir – YENİLƏNİB - 2 VİDEO
İstanbul, 8 oktyabr, AZƏRTAC
Türkiyənin İstanbul Valiliyi şəhərin Maltepe rayonunda çökən 7 mərtəbəli binanın dağıntıları altından 1 nəfərin meyitinin tapıldığını açıqlayıb. Daha 3 nəfərin axtarışları davam edir.
AZƏRTAC xəbər verir ki, dağıntıların altında qaldıqları ehtimal olunan şəxslərin xilas edilməsi məqsədilə bölgəyə 60-dan çox texnika, çox sayıda canlı qüvvə və xüsusi təlim keçmiş itlər cəlb olunub.
İndiyədək dağıntıların altından 10 nəfər xilas edilib.
11:26
Türkiyənin İstanbul Valiliyi şəhərin Maltepe rayonunda yerləşən 7 mərtəbəli binada baş verən çökmə ilə bağlı açıqlama yayıb.
AZƏRTAC xəbər verir ki, məlumata görə, hadisə bu gün saat 05:40 radələrində baş verib.
Axtarış-xilasetmə işləri zamanı indiyədək 3-ü uşaq olmaqla, 8 nəfər xilas edilib.
Əhali Qeydiyyat Sisteminə görə, bina 1987-ci ildə tikilib. Binanın birinci mərtəbəsindən iş yeri, yuxarı mərtəbələrdə yerləşən 12 mənzildən isə yaşayış məqsədilə istifadə olunur. Binada ümumilikdə 33 nəfər yaşayır. Çökmədən təsirlənməyən mənzillərdə yaşayan sakinlər hadisədən sonra təxliyə ediliblər.
Binanın çökmə baş verən hissəsindəki 4 mənzildə yaşayan 14 nəfərdən 8-i xilas edilib, 6 nəfərin axtarış-xilasetmə işləri davam etdirilir.
11:12
Türkiyənin İstanbul şəhərinin Maltepe rayonunda 7 mərtəbəli binanın ilk 3 mərtəbəsi çöküb. Hadisə yerinə AFAD, yanğınsöndürən, polis və təcili tibbi yardım qrupları cəlb olunub.
AZƏRTAC xəbər verir ki, ilkin məlumata görə, dağıntıların altında 7 nəfərin ola biləcəyi ehtimal edilir. Onlardan 4 nəfərlə əlaqə yaradılıb. 14 yaşlı uşaq isə dağıntıların altından sağ çıxarılıb.
Hadisə ilə bağlı İstanbul Anadolu Respublika Baş Prokurorluğu tərəfindən araşdırma aparılır.
Bölmənin digər xəbərləri
