Süd vəzi xərçənginin erkən aşkarlanması sağlam gələcəyin təminatıdır
Şamaxı, 28 oktyabr, AZƏRTAC
Şamaxıda qadın təhsil işçilərinin sağlamlığının qorunması, süd vəzi xərçənginin erkən aşkarlanması və profilaktik müayinələrin əhəmiyyəti ilə bağlı maarifləndirmə işlərinin gücləndirilməsi mövzusunda konfrans keçirilib.
AZƏRTAC-ın bölgə müxbiri xəbər verir ki, “1–31 oktyabr – Süd vəzi xərçəngi ilə mübarizə ayı” çərçivəsində “Sağlam qadın, sağlam müəllim, sağlam gələcək!” şüarı altında təşkil olunan tədbirdə dövlət qurumlarının, səhiyyə və təhsil müəssisələrinin, eləcə də həmkarlar ittifaqlarının nümayəndələri iştirak ediblər.
Şamaxı Rayon Mərkəzi Xəstəxanasının direktoru Natiq Əliyev çıxışında qadın sağlamlığının cəmiyyətin sağlam gələcəyinin formalaşmasında mühüm rol oynadığını bildirib. O, rayonun səhiyyə müəssisələrində bu istiqamətdə həyata keçirilən tədbirlərdən danışaraq, əhalinin sağlamlığının qorunması və profilaktik müayinələrə cəlb olunmasının əhəmiyyətini vurğulayıb.
Milli Məclisin deputatı Tamam Cəfərova çıxışında qadınların cəmiyyətdəki roluna, xüsusilə müəllimlərin gənc nəslin formalaşmasında daşıdığı məsuliyyətə toxunub. O, qadınların sağlamlığının qorunması ilə bağlı məlumatlılığın artırılmasının, sağlam həyat tərzinin təbliğinin və maarifləndirici təşəbbüslərin genişləndirilməsinin vacibliyini qeyd edib.
Şamaxı Rayon İcra Hakimiyyəti başçısının müavini Mehriban Eyyubova isə rayonda qadınların sosial rifahının yüksəldilməsi və sağlamlığının qorunmasının əhəmiyyətindən danışıb. O, bu məsələlərdə maarifləndirmə tədbirlərinin və aidiyyəti qurumlar arasında əməkdaşlığın vacibliyini diqqətə çatdırıb.
TƏBİB-in Tibbi xidmətin inkişafı departamentinin rəhbəri Yaqut Qarayeva səhiyyə sistemində profilaktik müayinələrin rolundan bəhs edib. O, xəstəliklərin vaxtında aşkarlanmasının müalicə prosesində əhəmiyyətini vurğulayaraq, bu sahədə həyata keçirilən layihələr barədə məlumat verib.
Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova qadınların sağlamlığının qorunmasının ailə institutunun möhkəmlənməsi və cəmiyyətin rifahı baxımından əhəmiyyətini qeyd edib. O, qadınların sağlamlıq məsələlərinə həssas yanaşılmasının və bu sahədə maarifləndirmə işlərinin davamlı aparılmasının vacibliyini vurğulayıb.
Səhiyyə İşçiləri Həmkarlar İttifaqı Respublika Komitəsinin sədri Elnara Muradova çıxışında qadınların əmək hüquqlarının təmin olunması ilə yanaşı, sağlamlığının qorunmasının da diqqətdə saxlanılmalı olduğunu bildirib. Elm və Təhsil İşçiləri Həmkarlar İttifaqı Respublika Komitəsi sədrinin baş müşaviri Pərvanə İsmayılova isə təhsil işçilərinə göstərilən diqqət və qayğıdan danışaraq, müəllimlərin sağlamlığının qorunması istiqamətində maarifləndirmənin əhəmiyyətinə toxunub.
Şamaxı Rayon Təhsil sektorunun müdiri Məsud Babayev qadın müəllimlərin bu cür təşəbbüslərdə fəal iştirakının vacibliyini qeyd edib. O, təhsil işçilərinin sağlamlıqla bağlı məlumatlılığının artırılmasının həm fərdi rifah, həm də təhsil mühitində sağlam həyat tərzinin təşviqi baxımından əhəmiyyətini diqqətə çatdırıb.
Tədbirin rəsmi hissəsindən sonra müzakirələr panel formatında davam etdirilib. Həkim-radioloq Sevinc Musayeva, həkim-onkoloq Gülnar Əbdülhəsənova, həkim mama-ginekoloq Elnarə Məmmədova və psixoloq Fidan Azərqızı süd vəzi xərçənginin erkən diaqnostikası, müayinə imkanları, müalicə üsulları və xəstələrə göstərilən psixoloji dəstək barədə ətraflı məlumat veriblər.
Mütəxəssislər çıxışlarında qadınların sağlamlıqlarına diqqətlə yanaşmasının, hər hansı narahatlıq yarandıqda vaxtında həkimə müraciət etməsinin və tibbi müayinələri laqeyd yanaşmadan həyata keçirməsinin əhəmiyyətini izah ediblər. Panel müzakirələri zamanı iştirakçıları maraqlandıran suallar cavablandırılıb, qadın sağlamlığı ilə bağlı məlumatlılığın artırılmasının əhəmiyyəti bir daha vurğulanıb.
Müxbir- Rəşad Rəşidov
Bölmənin digər xəbərləri
