“Qarabağ”ın legioneri: “Braqa” üzərində qələbə Azərbaycan futbolunu beynəlxalq arenada daha da tanıtdı
Bakı, 1 mart, AZƏRTAC
“Braqa” ilə çox emosional matç keçirdik. Bu hisslər bizim üçün yeni idi, çünki “Qarabağ” tarixində ilk dəfə Avropa Liqasının 1/8 mərhələsinə vəsiqə qazandı. Bununla da tarixi nailiyyətə imza atdıq”.
AZƏRTAC xəbər verir ki, bu sözləri “Qarabağ”ın futbolçusu Leandro Andrade komandasının UEFA Avropa Liqasının pley-off mərhələsində “Braqa” ilə keçirdiyi oyunlar (4:2, 2:3) barədə Portuqaliya mətbuatına açıqlamasında deyib.
24 yaşlı yarımmüdafiəçinin sözlərinə görə, çətin rəqiblərlə qarşılaşmaq komanda üçün əlavə motivasiyadır: “Çox iddialı və təhlükəli rəqiblə üz-üzə gələndə belə, irəliləmək və yaxşı nəticə qazanmaq haqqında düşünürük. “Braqa” ilə qarşılaşmadan öncə proqnozlara əsasən, onlardan zəif hesab olunurduq. Əslində bu, bizim üçün əlavə motivasiya oldu. Çünki güclü rəqibə qarşı mübarizə aparanda məsuliyyətimizin fərqində oluruq. Yaxşı nəticə üçün bütün diqqətimizi oyuna kökləyirik. Bu, heç də asan deyildi. Əla oyunçuları və bizdən qat-qat güclü heyəti olan "Braqa"ya qalib gəlməli idik. Baş məşqçimizin tapşırıqlarına tam əməl etdik. Onun göstərişləri bizim üçün çox vacibdir. Qurban Qurbanov “Braqa”nın oyun üslubunu yaxşı analiz etdi, bizə hər cəhətdən motivasiya verdi. Hər birimiz meydanda ən üstün tərəflərimizi ortaya qoyduq”.
Kabo-Verde millisinin üzvü “Qarabağ”ın həmişə öz oyununu göstərməyə çalışdığını söyləyib: “Öz potensialımızın fərqindəyik. “Braqa” mükəmməl futbolçulardan ibarət heyətə malikdir. Onların oyunlarını izləsəniz, yüksək səviyyəli komanda olduğunu görə bilərsiniz. Bu klubun keyfiyyətinə bələd olmaq üçün Çempionlar Liqasının qrup mərhələsində keçirdikləri matçları izləməyiniz kifayət edir. Qalib gəlmədikləri görüşlərdə belə üstün oynayıblar. Fantastik oyun nümayiş etdirib səviyyələrini bütün dünyaya göstəriblər. Bu komandanın heyətində Joau Moutinyu kimi təcrübəli oyunçu var. Mənim ona hörmətim böyükdür. Atası mənim məşqçim olub. Fikrimcə, oyun üslubu ilə ən çox təəccübləndirən futbolçulardan biri də məhz odur. Bizimlə hər iki matçda meydanda ən çox olan futbolçulardan biri idi. Yaşına baxmayaraq, hələ də “Braqa”nın ən yaxşısıdır. Sadəcə təəssüfləndiyim bir məqam var ki, Bakıdakı görüşdən sonra ondan forma götürə bilmədim”.
Yarımmüdafiəçi deyib ki, Portuqaliya təmsilçisi üzərində parlaq qələbə Azərbaycan futbolunu beynəlxalq arenada daha da tanıtdı: “Azərbaycan klublarından heç biri bu mərhələyə kimi gəlib çıxa bilməyib. İnsanlar eyforiyadadır, düşünürəm ki, tarixi uğurumuz barədə uzun illər danışılacaq. Qələbədən sonra Bakını xoş emosiyalar ələ keçirmişdi. Fikrimcə, "Qarabağ” beynəlxalq miqyasda hələ çox inkişaf edəcək. Bu, son qələbəmizlə məhdudlaşmayacaq. Əldə etdiyimiz heç bir nəticə təsadüf deyil. Bunun üçün həftələr, aylar, hətta illər lazım olur. Uğurumuz böyük zəhmətin bəhrəsidir. Burada dayanmayacaq, irəliləməyə davam edəcəyik".
Qurban Qurbanov haqqında da danışan 24 yaşlı oyunçu bildirib ki, təcrübəli mütəxəssisdən öyrənəcəyi çox şey var: “Burada debütüm sol cinah oyunçusu kimi olmuşdu, lakin zamanla hər iki mövqedə oynamağa uyğunlaşdım. Həm hücumameyilli yarımmüdafiəçi, həm də mərkəz yarımmüdafiəçisi kimi çıxış edə bilirəm. Burada hədsiz dərəcədə inkişaf etdiyimi hiss edirəm. Hər şeyi rahat və mükəmməl başa düşürəm”.
Qeyd edək ki, “Qarabağ” Avropa Liqasının 1/8 final mərhələsində Almaniyanın “Bayer” komandası ilə qarşılaşacaq. Oyunlar martın 7-də Bakıda, 14-də isə Leverkuzendə keçiriləcək.
Bölmənin digər xəbərləri
