“Qaradağlı faciəsi” sənədli filminin təqdimatı keçirilmişdir
Bakı, 15 fevral (AZƏRTAC). Fevralın 15-də Beynəlxalq Mətbuat Mərkəzində “Qaradağlı faciəsi” sənədli filminin təqdimatı keçirilmişdir.
AZƏRTAC xəbər verir ki, mərasimdə BDU-nun professoru, filologiya üzrə elmlər doktoru Cahangir Məmmədli çıxış edərək Dağlıq Qarabağ münaqişəsi, erməni cəlladlarının törətdikləri qanlı terror aksiyaları, o cümlədən 1992-ci il fevralın 17-də törədilmiş Qaradağlı faciəsi haqqında ətraflı söhbət açmışdır.
Sənədli filmin müəllifi və rejissoru Röya Qarabağlı bu ekran əsərini 1992-ci il fevralın 17-də Xocavənd rayonunun Qaradağlı kəndində törədilmiş faciədə həlak olmuş şəhidlərin övladlarının dilindən lentə aldığını, şahidlərin dili ilə faciənin mahiyyətini açmağa çalışdığını bildirmişdir.
Tədbirdə DVD formatda çəkilmiş 20 dəqiqəlik “Qaradağlı faciəsi” sənədli filmi nümayiş etdirilmişdir.
Filmdə doğma yurd-yuvalarını qorumaq naminə şəhid olan oğulların hər daş, hər ağac uğrunda necə fədakarlıqla döyüşdükləri əks olunmuşdur. Qeyri-bərabər döyüşdə düşmən qüvvəsi qarşısında 78 azərbaycanlı igidin necə əzmkarlıq nümayiş etdirməsi filmdə qabarıq göstərilmişdir.
Filmdə həvəskar aktyorlar Elşən Teymurlu, Əsgər Hüseynov, İlahə Zülfüqarova, Duyğu Hüseynova, Rasim Kərimli və başqaları çəkilmişlər.
Ekran əsərində şahidlərin söylədiklərindən əlavə nümayiş olunan kadrlar Bakı, Şamaxı və Sumqayıtın ətraf kəndlərində ekranlaşdırılmışdır.
Bölmənin digər xəbərləri
