QAX RAYONUNUN TƏSƏRRÜFATLARINDA MƏHSUL YIĞIMI BAŞA ÇATMAQ ÜZRƏDİR
Qax rayonunun fermer təsərrüfatlarında tütün və dən qarğıdalı istisna olunmaqla, bitkiçilik məhsulları yığımı artıq başa çatmışdır.
Rayon icra hakimiyyətindən AZƏRTAC-a bildirmişlər ki, fermerlər cari mövsümdə 578 hektar kartof sahəsindən 4.456 ton, bostan bitkiləri əkilmiş 368 hektar sahədən isə 1.600 ton məhsul tədarük etmişlər. Bundan əlavə, tərəvəz əkilmiş 652 hektar sahədən indiyədək 1.500 ton məhsul yığılmışdır. Hazırda təsərrüfatlarda tərəvəz yığımı davam edir.
Bu il rayonda 1.890 hektar sahədə dən qarğıdalı, 111 hektar sahədə isə tütün əkilmişdir. İndiyədək 700 hektar qarğıdalı sahəsinin məhsulu yığılmış, 2.100 ton məhsul istehsal olunmuşdur. Hələlik hər hektardan orta məhsuldarlıq 30 sentner təşkil edir. Tütün sahələrindən isə indiyədək 80 ton yaş tütün tədarük olunmuşdur. Məhsul yığımı davam edir.
Rayonun meyvə və fındıq bağlarında da məhsul yığımının qızğın çağıdır.
Rayonun taxılçılıq təsərrüfatlarında payızlıqların səpininə də ciddi hazırlıq görülür. İndiyədək rayon üzrə 1.800 hektar sahədə şum qaldırılmışdır.
Bölmənin digər xəbərləri
