CƏMİYYƏT
Qazaxıstan mətbuatında Şamaxı Cümə məscidi və Astrofizika Rəsədxanası barədə məqalələr dərc olunub
![](/files/galleryphoto/2020/1/1200x630/15814192345874851109_1200x630.jpg)
![](/files/galleryphoto/2020/1/1200x630/15814192343657057584_1200x630.jpg)
![](/files/galleryphoto/2020/1/1200x630/15814192344053030688_1200x630.jpg)
Nur-Sultan, 11 fevral, АZƏRTAC
Qazaxıstanlı jurnalist Oljas Berkinbayev Azərbaycana səfəri zamanı ölkəmizin bir sıra görməli və tarixi yerlərini ziyarət edib.
AZƏRTAC xəbər verir ki, jurnalist Şamaxı şəhərində qədim Cümə məscidi və Astrofizika Rəsədxanası barədə ətraflı məqalələr hazırlayıb.
“Türkistan.Today” saytında dərc edilən məqalələrdə Şamaxıda 743-cü ildə tikilən qədim Cümə məscidi haqqında geniş məlumat verilib. Məscidi ziyarət edən jurnalist abidənin tarixinə nəzər salıb, məhz cümə günündə təməli qoyulan məscidin Əbu Müslüm tərəfindən 743-744-cü illərdə inşa olunduğunu bildirib.
Qeyd edib ki, Qafqazın 734-cü ildə tikilmiş Dərbənd məscidindən sonra ən qədim məscidlərindən biri sayılan bu müqəddəs məkan 2009-cu ildə Prezident İlham Əliyevin göstərişi ilə bərpa edilib.
Şamaxının qədim və tarixi şəhər olduğunu qeyd edən jurnalist bildirib ki, ötən il 650 illik yubileyi təntənə ilə qeyd olunan böyük mütəfəkkir, şair İmaməddin Nəsiminin də bu torpaqda anadan olub.
Digər məqalədə isə Oljas Berkinbayev Nəsrəddin Tusi adına Şamaxı Astrofizika Rəsədxanası barədə ətraflı məlumat verib. Müəllif 1960-cı ildə tikilən rəsədxananın Azərbaycanın kosmik sahə üzrə mütəxəssislərinin hazırlanmasında mühüm rol oynadığını vurğulayıb. Qeyd edib ki, hələ ötən əsrin 60-80-ci illərində ölkəmizdə bu sahəyə böyük diqqət yetirən ümummilli lider Heydər Əliyevin birbaşa tapşırığı ilə 1976-cı ildə Azərbaycan Dövlət Universitetinin bazasında Astrofizika kafedrası açılıb.
İlahə Əhmədova
AZƏRTAC-ın xüsusi müxbiri
Nur-Sultan