Qazaxıstan XİN Qara dənizdə tankerlərə hücumla bağlı narahatlığını bildirib
Astana, 14 yanvar, AZƏRTAC
Qazaxıstan Respublikası Xarici İşlər Nazirliyi Qara dənizdəki Xəzər Boru Kəməri Konsorsiumunun dəniz terminalına doğru üzən üç tankerə pilotsuz uçuş aparatlarının hücumları ilə bağlı ciddi narahatlığını bildirib. AZƏRTAC xəbər verir ki, müvafiq açıqlama Qazaxıstan Xarici İşlər Nazirliyinin rəsmi nümayəndəsi Erlan Jetıbayev tərəfindən verilib.
Qeyd olunur ki, hadisələr bu il yanvarın 13-də baş verib. Qazaxıstan tərəfi bir sıra Avropa ölkələrinin səfirləri ilə təcili görüşlər, eləcə də Amerika tərəfi və digər xarici tərəfdaşlarla əlaqələr zamanı beynəlxalq hüquqa ciddi şəkildə uyğun olaraq dəniz yolu da daxil olmaqla karbohidrogen daşınmasının təhlükəsizliyini təmin etmək üçün effektiv tədbirlərin görülməsinin vacibliyini vurğulayıb.
Xarici İşlər Nazirliyi Qazaxıstan Respublikasının heç bir silahlı münaqişənin tərəfi olmadığını, qlobal və Avropa enerji təhlükəsizliyinin möhkəmləndirilməsinə mühüm töhfə verdiyini və beynəlxalq normalara tam uyğun olaraq enerji təchizatının təhlükəsizliyini təmin etdiyini vurğulayıb. Həmçinin bildirilib ki, sözügedən tankerlərdə bütün lazımi icazə sənədləri var və onlar tələb olunan identifikasiya avadanlıqları ilə təchiz olunub.
Nazirlik qeyd edib ki, bu cür hadisələrin sayının artması beynəlxalq enerji infrastrukturunun fəaliyyətinə artan riskləri göstərir. Qazaxıstan XİN tərəfdaşları gələcəkdə oxşar hadisələrin qarşısını almaq üçün birgə tədbirlər hazırlamaq üçün sıx əməkdaşlıq etməyə çağırıb.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
