Qazaxıstanın Energetika Nazirliyi qaz təchizatında fasilələrlə bağlı məlumatları təkzib edib
Astana, 21 oktyabr, AZƏRTAC
Qazaxıstanın Energetika Nazirliyi qaz təchizatında mümkün fasilələr barədə mətbuatda və sosial şəbəkələrdə yayılan xəbərləri təkzib edib.
AZƏRTAC nazirliyə istinadla xəbər verir ki, Orenburq Qaz Emalı Zavodunda (QEZ) baş vermiş insidentə baxmayaraq, Astana da daxil olmaqla ölkənin bütün regionlarına qaz təchizatı normal rejimdə və məhdudiyyətsiz həyata keçirilir.
“Əvvəlcədən nəzərdə tutulmuş ehtiyat mexanizmlər sayəsində təchizatın sabitliyi tam təmin olunur. Alınmayan qaz həcmləri mövcud müqavilələr çərçivəsində operativ şəkildə əvəzlənir. Bu səbəbdən daxili istehlakçılar, o cümlədən paytaxtın istilik elektrik stansiyaları üçün heç bir qaz çatışmazlığı yoxdur və gözlənilmir”, – deyə nazirlikdən bildirilib.
Qeyd olunub ki, qaz qəbulunda müvəqqəti məhdudiyyətlər səbəbindən Qaraçaqanak yatağının operatoru hasilat həcmlərində nəzarətli azalma həyata keçirib. “Bu tədbir Qazaxıstanın daxili bazarına qaz tədarükü üzrə öhdəliklərin yerinə yetirilməsinə təsir göstərmir”, – deyə nazirlik əlavə edib.
Bildirilib ki, Qaraçaqanakta yeni qaz emalı zavodunun tikintisi hökumətin strateji prioritetlərindən biri olaraq aktiv şəkildə nəzərdən keçirilir.
Energetika Nazirliyi vətəndaşlara və media nümayəndələrinə yalnız rəsmi mənbələrə istinad etməyi və yayılan spekulyativ məlumatlara inanmamağı tövsiyə edib.
Xatırladaq ki, oktyabrın 19-da Orenburq Qaz Emalı Zavodunda dron hücumu nəticəsində qəza vəziyyəti yaranıb.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
