Qazi Fəxri Əliyev: Biz bu gün qalib xalqıq, bununla fəxr edirik VİDEO
Ağcabədi, 19 oktyabr, Tahir Ağaməmmədov, AZƏRTAC
Ermənistanın hərbi təcavüzü nəticəsində 30 ilə yaxın işğal altında qalmış torpaqlarımız 44 günlük Vətən müharibəsində azad olundu. Azərbaycan Ordusunun qəhrəman hərbçiləri döyüş meydanında düşmənlə mərdcəsinə mübarizə apararaq, xalqımıza Qələbə sevinci yaşatdılar. Rəşadətli Ordumuzun şanlı Qələbəsi ilə başa çatan Vətən müharibəsində çəkinmədən ölümün üstünə gedən oğullarımızdan biri də əslən Laçın rayonundan olan Fəxri Əliyevdir.
AZƏRTAC-ın bölgə müxbiri Ağcabədi rayonunun Taxtakörpü ərazisində qəhrəman qazi görüşüb, Vətən müharibəsində keçdiyi döyüş yolu ilə bağlı təəssüratlarını öyrənib.
Fəxri Əliyev bildirib ki, 1995-ci ildə laçınlı məcburi köçkünlərin məskunlaşdıqları Ağcabədi rayonu ərazisindəki Taxtakörpü qəsəbəsində anadan olub. Ata-baba yurdunu görməsə də, hər zaman oraya qayıtmaq arzusu ilə yaşadığını deyən qazi qeyd edib: “Bizim hər zaman Laçına qayıtmağa ümidimiz var idi. Valideynlərim həmişə o torpaqlar haqqında xatirələrini danışırdılar. Torpaqlarımızın işğal altında olması bizim alnımızda bir ləkə idi. Bütün bunlar mənim hərbidə qalmağıma səbəb oldu. Həqiqi hərbi xidməti başa vurduqdan sonra 2014-cü ildən müddətdən artıq hərbi xidmətə başladım. Şükür edirəm ki, müharibə mən xidmətdə olduğum dövrə təsadüf etdi. 2020-ci il sentyabrın 27-də Vətən müharibəsi başlayanda bizim taborun da qarşısına tapşırıq qoyuldu. Cəbrayıl-Füzuli istiqamətində əks-həmlə əməliyyatına başladıq. Qarşımıza qoyulan bütün tapşırıqları layiqincə yerinə yetirdik. Alnımızda olan ləkəni aradan qaldırdıq”.
Fəxri Əliyev Füzulidən Şuşayadək şərəfli döyüş yolu keçib. Qarabağımızın baş tacı olan Şuşanın azad olunmasında iştirak edib, elə həmin istiqamətdə də yaralanıb.
“Taborumuzun qarşısına qoyulmuş ən çətin tapşırıq Şuşa şəhərinin azad olunması uğrunda döyüşlər oldu. Biz Şuşa-Laçın yolunu nəzarətə aldıq. Digər taborlar Şuşa şəhərinin strateji yüksəkliklərini ələ keçirdi. Bütün yollar bizim nəzarətimiz altında idi. Biz Şuşa-Laçın yolunun üzərindəki yüksəkliyi tutduqdan sonra digər taborlar müxtəlif istiqamətlərdən Şuşa şəhərinə daxil oldular. Bizim tapşırığımız düşmənin Laçın istiqamətindən gələn canlı qüvvəsinin və texnikasının qarşısını almaq idi. Bu tapşırığın öhdəsindən layiqincə gəldik. Laçın istiqamətindən gələn düşmənin canlı qüvvəsinin və texnikasının qarşısını kəsdik və onları məhv etdik. İmkan vermədik ki, Şuşada olan şəxsi heyətimizə arxadan zərbə endirsinlər. Həmin yüksəklikdə şəhidlərimiz, yaralananlarımız oldu. Mən də həmin yüksəklikdə yaralandım. Bununla qürur duyuram. Şəhidlər versək də, yaralılarımız olsa da, biz istəyimizə nail olduq, tapşırığı layiqincə yerinə yetirdik”.
Fəxri Əliyev deyir ki, 44 günlük Vətən müharibəsində hər bir Azərbaycan hərbiçisi böyük ruh yüksəkliyi ilə döyüşürdü. Hər kəs torpaqlarımızın azad olunması, qələbə eşqi ilə döyüşlərə atılırdı. “Hərbiçi üçün döyüşdə əsas ruh yüksəkliyi onun arxasında duran xalqıdır. Biz xalqımıza, Ali Baş Komandana güvənib döyüşürdük. Biz düşmənin zirehli texnikasının atdığı mərminin üzərinə gedirdik. Hər kəsdə böyük ruh yüksəkliyi var idi. Bizə məktəblilərin məktubları gəlirdi. Biz o məktubları oxuyurduq. Mənə çatan iki məktubu hələ də saxlayıram. Məktubla “Biz sizə güvənirik” yazısı bizə ruh yüksəkliyi verirdi. Şükür Allaha ki, xalqımızın etimadını doğrultduq. Bu gün biz qalib xalqıq, bununla fəxr edirik, qürur duyuruq”, - deyə Fəxri Əliyev əlavə edib.
Qeyd edək ki, baş çavuş Fəxri Əliyev Prezidentin sərəncamları ilə "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə", "Şuşanın azad olunmasına görə", "Vətən müharibəsi iştirakçısı" medalları ilə təltif olunub.
Bölmənin digər xəbərləri
