QAZILAR ŞURASI RAMAZAN AYININ BAŞLANMASI MÜNASİBƏTİLƏ FƏTVA VERMİŞDİR
AZƏRTAC xəbər verir ki, avqustun 30-da Qafqaz Müsəlmanları İdarəsi Qazılar Şurasının iclası keçirilmişdir.
İdarənin sədri Şeyxülislam Allahşükür Paşazadə mübarək Ramazan ayının başlanması münasibətilə xalqımızı təbrik etmiş, bu müqəddəs ayın əhəmiyyətindən danışmışdır. O, Azərbaycanda din siyasətinin ulu öndər Heydər Əliyevlə bağlı olduğunu, Prezident İlham Əliyevin bu siyasəti uğurla davam etdirdiyini bildirmişdir.
YAP icraçı katibinin müavini, Milli Məclisin deputatı Siyavuş Novruzov, Dini Qurumlarla İş üzrə Dövlət Komitəsinin sədri Hidayət Orucov, akademik Vasim Məmmədəliyev, Milli Məclisin deputatı Fəttah Heydərov və başqaları insanın mənəvi saflığı üçün orucluğun əhəmiyyətindən söhbət açmışlar.
Sonra Qazılar Şurasının mübarək Ramazan ayının başlanması münasibətilə fətvası oxumuşdur.
Fətvada bildirilir ki, sentyabrın 1-i Ramazan ayının ilk günüdür. Niyyət axşamı isə avqustun 31-nə təsadüf edir. Təzə ayın görünməsindən asılı olaraq, Ramazan bayramı miladi təqvimlə sentyabrın 30-na və ya oktyabrın 1-nə düşəcəkdir. Qafqaz Müsəlmanları oruc tutanlara kömək məqsədi ilə təqvim hazırlamışdır. Təqvimdə Ramazan orucunun tarixi, vacib əməlləri, gündəlik duaları, azan, namaz və iftar vaxtları barədə məlumat verilir. Bu məlumatlar Azərbaycan Milli Elmlər Akademiyasının Şamaxı Astrofizika Rəsədxanası tərəfindən hazırlanmışdır.
######
