QƏBƏLƏ RAYONUNUN MƏKTƏBLƏRİ YENİ DƏRS İLİNƏ HAZIRDIR
2007-2008-ci tədris ilinə hazırlıq məqsədilə Qəbələ rayonunun ümumtəhsil məktəblərində təmir-tikinti işləri aparılır, maddi-texniki baza gücləndirilir.
Rayon təhsil şöbəsindən AZƏRTAC-a bildirmişlər ki, Yaponiya səfirliyinin maliyyə vəsaiti hesabına Kötüklü kəndində inşa edilən 240 şagird yerlik orta məktəb binasının tikintisində son tamamlama işləri görülür. Regionların sosial-iqtisadi inkişafı Dövlət Proqramına uyğun olaraq, ötən il tikilib istifadəyə verilən 480 şagird yerlik Nohurqışlaq kənd orta məktəbi üçün hazırda 200 yerlik akt zalı və örtülü idman zalı inşa edilir. Ötən il inşa edilən 120 şagird yerlik Bum kənd əsas məktəbi üçün isə hazırda yeni qazanxana tikilir. Bundan əlavə, Qəbələ Dövlət Təbiət və Dəqiq Elmlər Kolleci üçün 380 yerlik məktəb binasının tikintisi başa çatmaq üzrədir. Müasir standartlara uyğun tikilərək yeni dərs ilində istifadəyə veriləcək kollecin yeməkxanası, yataqxanası, idman zalı və qazanxanası da olacaqdır.
Həmçinin, cari ildə Qəmərvan kəndində 320 şagird yerlik, Yenikənd və Yemişanlı kəndlərinin hər birində 480 şagird yerlik məktəb binalarının tikintisinə başlanılması nəzərdə tutulur. Yeni dərs ilinə hazırlıqla əlaqədar digər məktəblər də cari təmir olunmuş, yeni avadanlıqla təhciz olunmuşdur. Bugünədək rayon məktəblərinə Azərbaycan klassiklərinin latın qrafikası ilə çap olunmuş 38 min 403 ədəd müxtəlif adda kitabları paylanmışdır. Yaxın günlərdə rayonun 21 min şagirdinə yeni dərsliklərin çatdırılması təmin olunacaqdır.
Eyni zamanda, 2007-2008-ci tədris ili üçün ali məktəblərə keçirilən qəbul imtahanlarında iştirak edən qəbələli abituriyentlər yüksək nəticələr əldə etmişlər. Ali məktəblərə qəbul olunmaq üçün sənəd vermiş 1.184 abituriyentdən 287-si imtahanların birinci turunda arzusuna çatmışdır. Ötən il ali məktəblərə qəbul olunan gənclərdən 12-si 600-dən yuxarı bal toplamışdır, cari ildə bu rəqəm 19 olmuşdur. Təkcə Vəndam kənd 1 nömrəli orta məktəbin 6 məzunu 600-dən yuxarı bal toplamışdır. Bunud kənd orta məktəbinin məzunu Ceyhun Bəxtiyarzadə isə rayon üzrə ən yüksək - 673 bal toplayaraq Azərbaycan Tibb Universitetinə daxil olmuşdur. Həm tələbə qəbuluna, həm də ən yüksək bal toplayanlara görə Qəbələ rayonu ölkə üzrə ilk onluqda yer almışdır.
Bölmənin digər xəbərləri
