QƏBƏLƏDƏ QHT-LƏRƏ DÖVLƏT DƏSTƏYİ ŞURASININ REGİONAL TƏQDİMATI KEÇİRİLMİŞDİR
AZƏRTAC xəbər verir ki, avqustun 30-da Qəbələdə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının ilk regional təqdimat mərasimi keçirilmişdir.
Tədbirdə Şəki, Qəbələ, İsmayıllı, Qax və Oğuz rayonlarında fəaliyyət göstərən 40-a yaxın QHT təmsilçiləri, eləcə də 50-dən artıq bələdiyyə nümayəndəsi və Şura üzvləri iştirak etmişlər.
Mərasimdə çıxış edən Şuranın sədri, Milli Məclisin deputatı Azay Quliyev Prezident İlham Əliyevin təşəbbüsü ilə yaradılmış bu qurumun məqsəd və vəzifələrindən, gələcək fəaliyyətindən, QHT-lər üçün dövlətin ayırdığı qrant proqramlarının istiqamətlərindən, layihələrdə iştirak formalarından danışmışdır.
Bildirilmişdir ki, dövlət büdcəsindən QHT-lər üçün 1,5 milyon manat qrant vəsaitinin ayrılması nəzərdə tutulmuşdur. İndiyədək 191 QHT-nin layihəsi dəyərləndirilmiş və onlar üçün ümumilikdə 1,2 milyon manat vəsait ayrılmışdır. Həmin layihələri həyata keçirən QHT-lərdən 24-ü regionlarda fəaliyyət göstərir.
Diskussiya xarakterli tədbirdə Şuranın regionlarda ofislərinin açılması, gələcəkdə qrant proqramlarından bələdiyyələrin də bəhrələnməsinə imkan yaradılması, QHT-lərin qeydiyyatı probleminin həllinə kömək göstərilməsi və digər məsələlərlə bağlı təkliflər səslənmişdir.
Təqdimatdan sonra Şura üzvləri və katibliyin nümayəndələrinin iştirakı ilə təlim kurslarına başlanılmışdır. Kurslar iki gün davam edəcəkdir.
