QƏHVƏ İÇMƏK KİŞİLƏRDƏ XƏRÇƏNG XƏSTƏLİYİNƏ TUTULMAQ TƏHLÜKƏSİNİ ARTIRIR

12.09.2004 [00:17]
Çap et
A⁺ A^-

Qəhvə içmək kişilərin sidik kisəsi xərçəngi xəstəliyinə tutulmaq təhlükəsini artırır, özü də bu təhlükə içkinin həcmi çoxaldıqca daha da güclənir. AZƏRTAC-ın İTAR-TASS agentliyindən aldığı xəbərə görə, çoxlarının sevdiyi qəhvə ilə bu ağır xəstəlik arasındakı əlaqəni Kanada alimləri aşkarlamış və tədqiqatlarının nəticələrini “Kanadada xroniki xəstəliklər” jurnalında dərc etdirmişlər.

Alimlərin qənaətinə görə, gündə dörd və daha çox fincan qəhvə içən kişilərin həmin xəstəliyə tutulması təhlükəsi qəhvə içməyən nəzarət qrupu iştirakçılarından iki dəfə çoxdur. Kanadada kişilərdə sidik kisəsinin xərçəngi xəstəliyi onkoloji xəstəliklər arasında dördüncü yerdədir. Ekspertlərin fikrincə, təkcə bu il 3700 kanadalıda bu xəstəliyin əlamətləri aşkar edilmişdir. Layihənin aparıcı müəllifi xanım Enn-Mari Uqnat vurğulayır ki, tədqiqatların nəticələri qəti deyil, yalnız qəhvə ilə sidik kisəsi xərçəngi xəstəliyi arasında əlaqənin mümkünlüyünü nəzərdə tutur. Onun dediyinə görə, tədqiqatları daha əsaslı aparmaq lazımdır.

Səhiyyə Nazirliyinin apardığı tədqiqatlarda xərçəngə mübtəla olmuş 549 kişi və 1099 nəfər nəzarət qrupu üzvü iştirak etmişdir.