Qərbi Azərbaycandan olan soydaşımız Türkiyə-Yaponiya əməkdaşlığına töhfə verir
Ankara, 1 may, AZƏRTAC
Qərbi Azərbaycanda doğma torpaqlarından didərgin salınmış azərbaycanlıların xələfləri təkcə Azərbaycan və Türkiyənin tərəqqisinə deyil, həm də beynəlxalq əlaqələrin inkişafına töhfə verirlər.
AZƏRTAC-ın müxbiri Ankarada Türkiyə-Azərbaycan Dostluq, Əməkdaşlıq və Həmrəylik Vəqfi (TADİV) İdarə Heyətinin üzvü, Türkiyə-Yapon Vəqfinin rəhbəri professor Necat Bora Sayanla görüşüb. Onun əcdadları əsrlər boyu - ötən əsrin ilk onilliklərində İrəvanda yaşayıb və Şərqi Anadoluda fəaliyyət göstərən erməni quldur dəstələrinə qarşı fəal mübarizə aparıblar.
2019-cu ildən Ankaranın Oran rayonunda fəaliyyət göstərən Türk-Yapon Vəqfinə soydaşımız rəhbərlik edir. Bu fond vasitəsilə Türkiyədə yapon mədəniyyətinin təbliği və Yaponiya ictimaiyyətini türk mədəniyyəti haqqında məlumatlandırılması məqsədilə çoxsaylı proqram və tədbirlər təşkil edilir. O, söhbət əsnasında deyib:
“Arzu edənlərə ikebana və origami sənəti öyrədilir. Kendo döyüş sənəti üzrə idman klubları təşviq edilir, yapon dili kursları təşkil olunur. Yaponlar Türkiyədə keçirilən tədbirlərə dəvət olunur”.
Soydaşımız Türkiyə-Yaponiya əlaqələrinin inkişafına verdiyi töhfəyə görə hələ 2005-ci ildə Yaponiya Xarici İşlər Nazirliyi tərəfindən təltif edilib, 2014-cü ildə isə Yaponiyanın ən yüksək mükafatlarından birinə – “Doğan Günəş” imperator ordeninə layiq görülüb. Mükafatı Yaponiyanın Ankaradakı səfiri Akio Miyacima təqdim edib. Eyni zamanda, soydaşımız Türkiyəyə səfər edən Yaponiya imperator ailəsinin üzvlərini də müşayiət edir.
Necat Bora Sayan qeyd edir: “Həm anam, həm də atam tərəfdən Qərbi Azərbaycandanam. Tayfanın bir qolu da İrəvanda yaşayıb. XVIII əsrin birinci yarısına aid şəhadətnamələr var ki, Ramazanoğlular nəsli daha qədimdir. Bu ailənin bəzi üzvləri sonradan başqa, məsələn, Tufan soyadını alıblar. Bu məlumatları arxiv tədqiqatım zamanı, Bakıya son səfərimdə əldə etmişəm. Qərbi Azərbaycanda bizim ailənin mülkiyyət hüquqları var, həm də onlar 1730-cu ilə aiddir. Düşünürəm ki, Qərbi Azərbaycandan olan bütün insanlar bu nümunəyə əməl etməlidirlər ki, əllərində dəlil olsun və öz haqları uğrunda mübarizə aparsınlar”.
Professor Qərbi Azərbaycanda doğma torpaqlarından didərgin salınmış azərbaycanlıların nəslinin Azərbaycan dövlətinin və Qərbi Azərbaycan İcmasının müəyyən etdiyi kursla getməli olduğuna əminliyini ifadə edib: “Əminəm ki, bu, tarixi hüquqların bərpasının ən etibarlı yoludur. Genealoji arxivlərin tədqiqi üzrə fərdi səylərin vacibliyini də vurğulamaq istəyirəm”.
O bildirib ki, Osmanlı dövlətinin zəifləməsindən istifadə edən ermənilərin qanlı cinayətləri fonunda Hacı Ələkbər Tufan başda olmaqla ailənin bəzi nümayəndələri bu dəstələrə qarşı mübarizədə birləşiblər.
Vəqf rəhbəri erməni quldur dəstələrinə qarşı döyüşən Qərbi azərbaycanlıların xatirəsinin əbədiləşdirilməsi məqsədilə İqdırda abidə ucaldılacağına ümidvar olduğunu bildirib.
O, həyatı boyu özünü həm Türkiyə, həm də Azərbaycan mədəniyyətinin, ideyalarının daşıyıcısı kimi hiss etdiyini vurğulayıb. TADİV İdarə Heyətinin üzvü əlavə edib: “Azərbaycanın mənim qəlbimdə xüsusi yeri var. Bura ata və babalarımın vətənidir. Məni hər iki ölkə ilə birləşdirən bağlar haqqında düşüncələrdən güc alıram”.
Professor, eyni zamanda, Qərbi Azərbaycandan olanların və ümumiyyətlə, Türkiyə sakinlərinin ölkəmizin hər bir uğuruna ürəkdən sevindiyini vurğulayıb: “44 günlük Vətən müharibəsində Azərbaycanın Qələbəsi xüsusilə qürurvericidir. Əminəm ki, birlik və həmrəylik bütün türkdilli dövlətlərin nüfuzunu və mövqeyini gücləndirəcək. Həmçinin türk diasporunun lobbiçilik fəaliyyəti də çox mühümdür ki, bu da maraqların, o cümlədən erməni yalanlarının ifşa edilməsi məqsədi ilə daha fəal təbliğata imkan verəcək”.
N.B.Sayan 1958-ci ildə İqdırda anadan olub. O, Ankara Universitetinin Stomatologiya fakültəsini bitirib və təhsilini ağız boşluğu və üz-çənə cərrahiyyəsi üzrə fəlsəfə doktoru elmi dərəcəsi ilə davam etdirib. 1989-1991-ci illərdə Yaponiyada ixtisasını artırıb, 1994-cü ildə Türkiyəyə qayıtdıqdan sonra Ankara Universitetinin Stomatologiya fakültəsinin baş həkimi və dekan müavini olub. Professor bildirir: “2000-2010-cu illər arasında yuxarıda adı çəkilən fakültənin dekanı vəzifəsində çalışdım. Bu illər ərzində mən tez-tez Bakıda səfərdə olmuşam, Azərbaycanda da stomatologiyanın inkişafına öz töhfəmi verməyə çalışıram”.
Professor Türkiyə Stomatoloqlar Birliyinin nümayəndəsi qismində Qırğızıstan, Özbəkistan, Türkmənistan və Qazaxıstana da səfərlər edib, Türk dünyası ölkələrində tibb sahəsində Türkiyə universitetlərinin əldə etdiyi təcrübələri bölüşüb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
