“Qərbi Çıraq” platformasından ilk qaz hasilatına ilin sonundan başlanacaq
Bakı, 1 may, AZƏRTAC
Cari ilin birinci rübü ərzində “Azəri-Çıraq-Günəşli” (AÇG) üzrə fəaliyyətlərə təqribən 115 milyon dollar əməliyyat məsrəfləri və 251 milyon dollar əsaslı məsrəflər xərclənilib. Ötən ilin eyni dövrü ilə müqayisədə əməliyyat məsrəfləri sabit qalıb və əsaslı məsrəflər 27,7 faiz azalıb.
AZƏRTAC bp-nin bu ilin birinci rübünün yekunlarına dair hesabatına istinadən xəbər verir ki, AÇG yatağında aparılan 4-ölçülü (4D) yüksəkdəqiqlikli dənizdibi qovşaqlarla seysmik 5-illik tədqiqat proqramı çərçivəsində 2024-cü ildə əldə olunmuş seysmik məlumatların emalı və mayda başlanması nəzərdə tutulan növbəti məlumat toplanması işlərinə - ikinci il üçün proqrama, hazırlıq birinci rüb ərzində davam edib.
Hesabata əsasən, ilin ilk üç ayında AÇG-dən stabil hasilat təhlükəsiz və etibarlı şəkildə davam edib. Rüb üçün AÇG-dən ümumi hasilat – “Çıraq” (21 min), “Mərkəzi Azəri” (87 min), “Qərbi Azəri” (76 min), “Şərqi Azəri” (43 min), Dərinsulu Günəşli (54 min), “Qərbi Çıraq” (25 min) və ACE (25 min) platformalarından birlikdə – gündə orta hesabla 331 min barel və ya ümumilikdə təxminən 30 milyon barel, yəni 4 milyon ton olub. Bu, ötən illə müqayisədə 1 milyon barel azalma deməkdir.
Fevralın 18-i AÇG layihəsi “Mərkəzi Azəri” platformasından ilk neftin əldə olunmasının 20 illiyini qeyd edib. Həmin vaxtdan platformadan ümumilikdə 1,1 milyard barel (152 milyon ton) neft hasil edilib.
Rübün sonunda AÇG-də ümumilikdə 145 neft hasilatı quyusu, 44 su injektoru quyusu və 8 qaz injektoru quyusu istismarda olub.
Birinci rüb ərzində AÇG-də 2 neft hasilatı quyusu qazılıb və onlardan biri tamamlanıb. Həmçinin 1 qaz injektoru quyusu da qazılıb.
Hesabat dövrü ərzində AÇG-dən Azərbaycan dövlətinə əsasən Səngəçal terminalından, həmçinin “Neft Daşları”ndakı qurğu vasitəsilə gündə orta hesabla 11 milyon kubmetr, ümumilikdə isə 0,9 milyard kubmetr səmt qazı təhvil verilib. Hasil edilən səmt qazının qalan hissəsi təzyiqi saxlamaq məqsədilə yenidən kollektora vurulub.
AÇG yatağındakı sərbəst təbii qaz (STQ) ehtiyatlarının kəşfiyyatı, qiymətləndirilməsi, işlənməsi və hasilatı ilə bağlı işləri irəlilətmək məqsədilə 20 sentyabr 2024-cü il tarixində AÇG üzrə mövcud hasilatın pay bölgüsü sazişinə (HPBS) yeni bir əlavə imzalanıb. AÇG yatağının çıxarılabilən STQ ehtiyatlarının xeyli iri həcmdə - 4 trilyon kub futadək olduğu düşünülür.
Bu sənədə uyğun olaraq, SOCAR və AÇG tərəfdaşları hazırda STQ laylarının işlənməsi üçün növbəti fəaliyyətləri planlaşdırırlar. Bu işlərin bir hissəsi kimi iki prioritet layı hədəfləyən ilkin quyu qazılıb. Bu quyu olduqca əhəmiyyətlidir, çünki o, hasilat vasitəsilə qiymətləndirmə aparmağa da imkan verəcək ki, bunun əsasında da gələcək işlənmə planlarını qurmaq mümkün olacaq.
Quyu mövcud “Qərbi Çıraq” platformasından qazılıb. İlk qaz hasilatının bütün tamamlama və sualtı birləşdirmə işləri bitdikdən sonra 2025-ci ilin sonunadək başlanacağı gözlənilir.
Bölmənin digər xəbərləri
