Bakı, 28 aprel, AZƏRTAC

Qida Təhlükəsizliyi Agentliyinin sədri Qoşqar Təhməzli ilə Rusiya Federasiyasının Baytarlıq və Fitosanitar Nəzarəti üzrə Federal Xidmətinin (“Rosselxoznadzor”) rəhbəri Sergey Dankvert arasında telefon danışığı olub.

Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, telefon danışığı zamanı Azərbaycanla Rusiya arasında qida sahəsində idxal-ixrac əməliyyatları zamanı həyata keçirilən nəzarət tədbirləri və ixrac olunan məhsul partiyalarından götürülən nümunələrin laborator müayinələrinə dair məsələlər müzakirə edilib.

Eyni zamanda söhbət zamanı Azərbaycandan Rusiyaya qida məhsulları ixrac edən bir sıra şirkətlərin (“Atena”, “Sunaz”, “Kəf”), eləcə də Rusiyadan ölkəmizə qida məhsulları idxal edən şirkətlərin məhsullarında qida təhlükəsizliyi və keyfiyyət göstəriciləri ilə bağlı fikir mübadiləsi aparılıb. Həmçinin Azərbaycanda fəaliyyət göstərən logistik şirkətlər tərəfindən bitkiçilik məhsullarının Rusiyaya ixracı zamanı yol verilən pozuntular müzakirə olunub və bu sahədə nəzarət tədbirlərinin gücləndirilməsinin vacibliyi vurğulanıb.

Telefon danışığı zamanı bu il yanvarın 1-dən qüvvəyə minən “Qida təhlükəsizliyi haqqında” Qanun və həmin qanundan irəli gələn tələblər, eləcə də qarşılıqlı maraq doğuran digər məsələlər ətrafında da fikir mübadiləsi aparılıb.