Qırğızıstan İssık-Kul vilayətində meşələrin bərpası və dağ ekosistemlərinin mühafizəsi üzrə səylərini gücləndirir
Bakı, 11 dekabr, AZƏRTAC
Qırğızıstan meşələrin bərpası üzrə milli sistemlərin möhkəmləndirilməsi, ting istehsalı üçün infrastrukturun təkmilləşdirilməsi və meşə örtüyünün uzunmüddətli genişləndirilməsi üçün şəraitin yaradılması yolu ilə “FRIENDS” layihəsinin icrasına fəal dəstək verir. Meşə örtüyünün genişləndirilməsi ekoloji təhlükəsizliyin təmin edilməsi, kənd rayonlarının davamlı inkişafı və əhalinin rifahının yüksəldilməsi istiqamətində mühüm addımdır.
AZƏRTAC BMT-nin Ərzaq və Kənd Təsərrüfatı Təşkilatına (FAO) istinadla xəbər verir ki, İssık-Kul vilayətinin Ton rayonundakı Kara-Kemer dərəsində “Yaşıl irs” milli kampaniyası çərçivəsində ağacəkmə aksiyası keçirilib.
Aksiya zamanı 2 hektarlıq ərazidə iynəyarpaqlı ağaclar əkilib, bununla da Kara-Kemer dərəsində ümumi sahəsi 30 hektar olan daha böyük meşə bərpası sahəsinin formalaşdırılmasına töhfə verilib.
“FRIENDS” layihəsi müasir meşəçilik metodlarının təşviqi, mütəxəssislərin hazırlanması, pilot meşəbərpa sahələrinin yaradılması və Mərkəzi Asiya ölkələri arasında bilik mübadiləsini dəstəkləyir. Xüsusi diqqət dayanıqlı meşə idarəçiliyinə, iqlim dəyişikliyinə davamlılığa, gender inklüzivliyinə və ölkələrin qabaqcıl beynəlxalq təcrübələrə çıxış imkanlarının genişləndirilməsinə yönəldilir.
Bu təşəbbüs FAO-nun regionda ekoloji dayanıqlığın artırılmasına yönəlmiş genişmiqyaslı fəaliyyətinin mühüm tərkib hissəsidir və BMT-nin Dayanıqlı İnkişaf Məqsədlərinin 13-cü (İqlim dəyişikliyi ilə mübarizə), 15-ci (Quruda həyat) və 17-ci (Məqsədlərə nail olmaq üçün tərəfdaşlıq) bəndlərinin irəliləyişinə töhfə verir.
Bölmənin digər xəbərləri
