Qırğızıstanda Çin şirkəti ilə yerli əhali arasında münaqişə baş verib
Bakı, 6 avqust, AZƏRTAC
Qırğızıstanın Milli Təhlükəsizlik Komitəsi Solton-Sarı qızıl mədənini işlədən Çin şirkəti ilə yerli əhali arasında baş vermiş münaqişə ilə bağlı məlumat yayıb. AZƏRTAC Kabar rəsmi agentliyinə istinadla xəbər verir ki, komitənin məlumatında və Baş Nazir Muhammedkaliy Abılkaziyevin bəyanatında milli zəmində münaqişə yaratmaq istəyənlərin hərəkətləri kəskin şəkildə pislənilib.
Qeyd olunur ki, sözügedən münaqişə avqustun 5-də başlayıb. Təxminən 300 nəfərdən ibarət yerli sakinlərdən ibarət bir qrup ətraf mühitə zərər verdiyi üçün qızıl mədəninin bağlanması tələbi irəli sürüb. Mədənin operatoru olan Çinin Zhong Ji Mining şirkətinin əməkdaşları ilə yerli əhalinin qarşıdurması nəticəsində ən azı 20 nəfər yaralanıb. Qırğızıstan Baş Nazirinin müavini Kubatbek Boronov və DİN-in rəhbəri Kaşkar Cunuşaliyev hadisə yerinə gəliblər. Bu insidentlə bağlı hökumətin də Bişkekdə xüsusi müşavirəsi keçirilib .
Milli Təhlükəsizlik Komitəsi yerli əhalini təxribatçıların oyunlarına qarşı ayıq olmağa çağırıb və onlara qarşı qanun çərçivəsində tədbirlər görüləcəyini vəd edib.
Bölmənin digər xəbərləri
