- Əziz bacılar və qardaşlar!

Əziz dostlar!

Mən sizin hamınızı ürəkdən salamlayıram, sizi öpürəm, bağrıma basıram.

Bir il bundan əvvəl sizinlə bu yerdə görüşmüşdük. Çox səmimi görüş olmuşdu, onu bu günə qədər xatırlayıram. Bu dəfə buraya gələndə dedim ki, mütləq yenə öz qardaşlarımın yanına gedəcək, dağ yəhudiləri ilə görüşəcəyəm. Çünki sizi görmək mənim üçün həmişə çox xoşdur. Burada olan əhval-ruhiyyə, Azərbaycan dövlətinə bağlılıq, məhəbbət çox güclüdür. Bu, bir daha onu göstərir ki, Azərbaycan bütün xalqların böyük, gözəl ailəsidir. Biz böyük ailə kimi yaşayırıq. Azərbaycanda heç vaxt dini, milli, etnik zəmində ayrı-seçkilik olmamışdır və olmayacaqdır. Bu, Azərbaycan dövlətinin siyasətidir. Bu siyasəti bizim millətimizin, xalqımızın ümummilli lideri Heydər Əliyev bizə miras qoyubdur. Həmin siyasət Azərbaycanda bu gün də davam etdirilir. Dini dözümlülük, milli dözümlülük, tolerantlıq bizim ən böyük sərvətlərimizdən biridir. Azərbaycan bu baxımdan dünyada çox böyük bir örnəkdir, nümunədir. Bütün xarici səfərlər zamanı görüşdüyüm insanlarla, siyasətçilərlə söhbətlərdə istər-istəməz bu məsələyə də toxunulur və mən çox şadam ki, bu məsələ artıq dünyada tanınır və bəyənilir. Amma bu, bizim normal həyat tərzimizdir. Biz Azərbaycanı başqa cür təsəvvür edə bilmərik. Azərbaycanın hər bir vətəndaşı mənim üçün əzizdir, hər bir sakini mənim üçün doğmadır. Mən bu mehribanlığı, bu səmimiliyi, bu qardaşlığı görəndə daha da sevinirəm, daha da fərəhlənirəm. Məndə inam daha da artır ki, Azərbaycanın qarşısında duran bütün vəzifələr layiqincə yerinə yetiriləcəkdir.

Qarşımızda isə çoxlu vəzifələr durur. Bir il bundan əvvəl buraya gələrkən, vəziyyətlə tanış olarkən, ümumiyyətlə, Qubada gedən abadlıq işləri ilə tanış olarkən görürdüm ki, artıq canlanma başlayıb, irəliləyiş var. İndi isə bu, özünü daha da qabarıq şəkildə göstərir. Regionların inkişaf proqramı, onun icrası, yüz minlərlə yeni iş yerlərinin açılması, insanların həyat səviyyəsinin yaxşılaşması, minimum əmək haqqının artırılması, sənaye obyektlərinin işə salınması, sürətli iqtisadi inkişaf - bütün bunlar Azərbaycanın reallıqlarıdır. Bütün istiqamətlərdə bizim siyasətimiz düşünülmüş şəkildə aparılır, proqram şəklində aparılır. Bu meyillər gələcəkdə daha da sürətlənəcəkdir. Çünki bizim iqtisadi potensialımız daha da artacaqdır.

Mən buraya bax, o binadan gəlirəm, Ərazi vergilər idarəsinin yeni tikilmiş binasından gəlirəm. Orada vəziyyətlə tanış oldum və bir daha Vergilər Nazirliyinin qarşısında vəzifə qoydum ki, Azərbaycanın gələn il büdcəsi 3 milyard dollar olsun. Bu, nə deməkdir?! O deməkdir ki, təxminən 1 milyard dollar əlavə vəsaitimiz olacaq və biz gərək bundan səmərəli istifadə edək, insanlarımızın həyat səviyyəsinin yaxşılaşmasına, yeni iş yerlərinin açılmasına, iqtisadi potensialın güclənməsinə, ordumuzun güclənməsinə yönəldək və bunu edəcəyik. Çünki ölkəmizin ehtiyacları çoxdur, problemlər də çoxdur. Onların ən böyüyü, bizi ən çox incidən, narahat edən yoxsulluq problemidir. Düzdür, ilyarım ərzində yoxsulluğun səviyyəsi 49 faizdən 40 faizə düşübdür. Amma 40 faiz də çoxdur.

Bu, bizə yaraşmır. Azərbaycanda yoxsulluq olmamalıdır və olmayacaqdır.

Yoxsulluğun da səbəbləri məlumdur. 1990-cı illərin əvvəllərində ölkəmizə vurulmuş ziyan, Azərbaycanı həm iqtisadi, həm də siyasi cəhətdən çox güclü, çox möhkəm sarsıtmışdı. Biz hələ indi özümüzə gəlirik. Belə olan halda ölkədə olan yoxsullar təbəqəsi, əlbəttə ki, bizi çox narahat edir. Mövcud meyillər göstərir ki, yoxsulluq azalır, bu il 40 faizdirsə, gələn il daha aşağı səviyyədə olacaqdır. Çünki maaşlar artır, imkanlar yaranır, iş yerləri açılır, işsizlik aradan qaldırılacaqdır.

İki il bundan əvvəl oktyabr ayında, prezident seçkiləri ərəfəsində Qubada olarkən demişdim ki, Prezident seçilərəmsə, Azərbaycanda 5 il ərzində 600 min yeni iş yeri yaradılacaqdır. Bizi istəməyən qüvvələr buna mənfi münasibət göstərdilər, dedilər ki, İlham Əliyev seçkiqabağı vədlər verir. Çünki onlar özləri boş vədlər verirlər. Amma bizim verdiyimiz vədlər, həyatda öz əksini tapır. Əsas məsələ odur ki, sözlə əməl bir olsun. Baxın, ilyarım keçib, Azərbaycanda 250 min iş yeri yaranıbdır. Bu proses daha da güclənəcək, sürətlə gedəcəkdir. Qarşımızda duran bütün məsələlər öz həllini tapmalıdır. Bütün sahələrdə irəliləyiş var, bizi narahat edən problemlər də yavaş-yavaş aradan qaldırılacaqdır. Bunu etmək üçün hər bir şərait var. Azərbaycan dövlətinin iradəsi var, düşünülmüş siyasəti, strategiyası var. Azərbaycan xalqının Azərbaycan rəhbərliyinə inamı var, dəstəyi var. Bu inam mənə imkan verir ki, islahatları daha da sürətlə aparım.

Azərbaycanın böyük təbii sərvətləri də var. Xalqımızın lideri Heydər Əliyevin təşəbbüsü ilə, uzaqgörənliyi ilə hazırlanmış neft strategiyamız bu gün Azərbaycana böyük uğurlar gətirir. Bakı-Tbilisi-Ceyhan neft kəməri reallıqdır. Qaz kəməri tikiləcək, ölkəmizə milyardlarla dollar pul gələcəkdir. Bu pul da şəffaf şəkildə Dövlət Neft Fondunda yığılır və yığılacaqdır. Hər bir vətəndaş bilir ki, dövlətdə nə qədər pul var. Bu da çox vacibdir ki, hamı bilməlidir, nəyimiz var və bunlar necə xərclənməlidir. Bir sözlə, gələcək illər Azərbaycanın inkişafına çox güclü təkan verəcəkdir. Gələcək illərdə həm imkanlarımız artacaq, həm də yeni iş yerləri açılacaq, iqtisadiyyatımız daha da inkişaf edəcəkdir.

Əlbəttə, bütün bunlara nail olmaq üçün sülh lazımdır, əmin-amanlıq lazımdır, sabitlik lazımdır. Sabitliyi pozmaq istəyən qüvvələr öz layiqli cavablarını aldılar, əgər bir də belə cəhdlər göstərilərsə, Azərbaycan xalqı onlara öz layiqli cavabını verəcəkdir.

Bizi ən çox narahat edən Ermənistan-Azərbaycan, Dağlıq Qarabağ münaqişəsidir. Uzun illərdir ki, bu məsələ həll olunmamış qalır. Əfsuslar olsun ki, beynəlxalq təşkilatların vasitəçilik missiyası heç bir nəticəyə gətirib çıxarmadı. Son zamanlar o vasitəçilər daha da fəallaşıblar, müxtəlif ideyalar meydana çıxır və danışıqlar prosesində Azərbaycanı qane edən məqamlar çoxalmaqdadır. İlk növbədə, problemin mərhələli həll yolu ilə aradan qaldırılması artıq dünya birliyində qəbul edilən bir yanaşmadır. Bizim məqsədimiz ondan ibarətdir ki, Azərbaycanın suverenliyi bərpa olunsun. Bizim başqa dövlətin torpağında gözümüz yoxdur, amma öz torpağımızı da heç kimə verən deyilik. Dağlıq Qarabağ Azərbaycan torpağıdır və Azərbaycan torpağı olaraq qalacaqdır. Çünki əsrlər boyu Azərbaycanın torpağı olubdur. Bundan sonra da biz nail olmalıyıq və nail olacağıq ki, Dağlıq Qarabağın Azərbaycana qaytarılması mümkün olsun. Diplomatik, siyasi, iqtisadi səylər çox önəmlidir və biz bunu edirik.

Eyni zamanda, düşmən bilməlidir ki, bizim gücümüz var, güclü ordumuz var. Ona görə ordu quruculuğuna göstərilən diqqət məhz bu məqsədi daşıyır.

Bizim büdcəmiz bu il 2004-cü illə müqayisədə təxminən 40 faiz artıbdır. Hərbi xərclərimiz 76 faiz artıb və bundan sonra da artacaqdır. Biz qüdrətli ordu yaradacağıq və istənilən vaxtda, istənilən yolla öz doğma torpaqlarımızı azad edəcəyik.

Əziz bacılar və qardaşlar!

Mən bu gün çox xoşbəxtəm ki, yenidən sizinlə birlikdəyəm. Keçən dəfə burada olarkən mən sual verdim ki, probleminiz nədir, sizə necə kömək eləyim. Dedilər ki, Sizin sağlığınız, hər şey yaxşıdır, əgər problemlər varsa, rayon icra hakimiyyəti ilə birlikdə biz özümüz bunları həll eləyirik. Mən istəyirəm ki, problemlər ümumiyyətlə, aradan qaldırılsın. Azərbaycan xalqı, Azərbaycanda yaşayan bütün insanlar, bütün xalqlar daha da yaxşı həyata layiqdirlər. Biz bunu təmin edəcəyik. Biz Azərbaycanı qüdrətli ölkəyə çevirəcəyik ki, hər bir vətəndaş azad yaşasın, rahat yaşasın, işlə təmin olunsun, yaxşı maaş alsın, övladları yaxşı oxusunlar, mehribançılıq olsun. Azərbaycanda biz bunu istəyirik. Bu meyillər var, amma istəyirəm ki, bu müsbət meyillər daha da geniş vüsət alsın.

Yəhudilər mənim qardaşlarımdır, mən bu duyğularla, bu hisslərlə yaşayıram. Siz qeyd elədiniz, mənim yadımdan çıxdı. Kolumbiya Universitetində mənə bu barədə sual verdilər. Mən ürəkdən gələn sözlərimi deyirəm. Orada da nə təbliğat naminə, yaxud da ki, hansısa bir siyasi xal qazanmaq üçün demədim. Çünki onu bir dəfə demək olar və ondan sonra unudula bilər. Bu, bizim siyasətimizdir, bizim əməlimizdir, bizim işimizdir. Azərbaycanda bir neçə adam var, adını siyasətçi qoyub, amma nə ilə məşğul olur? Boşboğazlıqla, boş-boş şeylər danışır, adama yaraşmayan ifadələr səsləndirirlər. Amma bunların arxasında heç nə yoxdur. Nə iş var, nə əməl var, nə hansısa bir xəstəyə əl uzadır, nə qaçqına kömək edib, nə daşı-daş üstünə qoyub, nə cəmiyyət üçün hansısa bir faydalı iş görübdür. Yox, ancaq söz danışmaq, boş-boş vədlər vermək, həqiqətə uyğun olmayan sözlər danışmaq - budur onların işi. Bizim siyasətimiz bizim işimizdir. Bu iş bütün sahələrdə özünü göstərir: xarici siyasətdə real nəticə var, daxildə də var, iqtisadiyyatımız dünyada ən yüksək sürətlə artır. Bu, bizim sözümüz deyil, Beynəlxalq Valyuta Fondunun sözüdür. 2005-ci ildə Azərbaycan iqtisadiyyatı artım sürətinə görə dünyada lider ölkə olacaqdır. Azərbaycanda yaşayan bütün xalqlara diqqət, qayğı artıbdır. Mən bunun tərəfdarıyam, bu, mənim siyasətimdir. Azərbaycanda heç vaxt ayrı-seçkilik olmamalıdır və heç vaxt da olmayacaqdır. 1990-cı ilin əvvəllərindəki yanlış, cinayətkar siyasətin nəticəsində Azərbaycanda milli zəmində problemlər əmələ gəlməyə başlamışdı. Amma Azərbaycan xalqı buna dözmədi. O iqtidar hakimiyyətdə cəmi bir il qaldı. Nəyə görə? Xalq dözmədi buna, imtina elədi onlardan, rədd elədi o siyasəti. Azərbaycanda heç vaxt ayrı-seçkiliyə yol verilməyəcəkdir. Heç vaxt dini, milli zəmində fərq qoyulmayacaqdır. Bu, bizim siyasətimizdir. Azərbaycan xalqının siyasətidir və biz birlikdə bunu davam etdirəcəyik.

Mən sizi ürəkdən salamlayıram, sizə ən xoş arzularımı, ən xoş duyğularımı çatdırıram. Həmişə belə xoş əhval-ruhiyyədə olasınız. Həmişə üzünüz gülsün, həmişə bir yerdə olaq, yığışaq, danışaq, söhbətləşək, ölkəmizin bütün problemlərini bir yerdə həll edək.

Sizə cansağlığı, yeni-yeni uğurlar arzulayıram!

Sağ olun!

X X X

Azərbaycan Prezidenti İlham Əliyev qəsəbə sakinləri ilə xatirə şəkli çəkdirdi, onlarla səmimi görüşüb ayrıldı.