DÜNYA
“Qızıl vizalar” Macarıstana geri dönür
Budapeşt, 17 noyabr, AZƏRTAC
Macarıstan daşınmaz əmlaka sərmayə yatıranlar üçün “Qızıl vizalar” proqramını altı ildən sonra yenidən dövriyyəyə buraxır.
AZƏRTAC “Bloomberg”ə istinadla xəbər verir ki, qanun layihəsinin yeni redaksiyası immiqrasiyanın məhdudlaşdırılmasına yönəldilib.
Belə vizanı almaqdan ötrü lazım olan investisiyanın minimal məbləği hazırda 250 min avro təşkil edir. 2017-ci ildə ölkə Çin və Rusiyadan miqrasiya axını fonunda analoji proqramı bağlamışdı. O vaxt ölkədə yaşama icazəsi sənədi qismində alıcılara 200 min avro həcmində dövlət istiqrazları təqdim olunurdu.
“Qonaq-investor proqramı” yerli daşınmaz əmlak fondlarına azı 250 min avro və ya Macarıstan daşınmaz əmlakına 500 min avro sərmayə yatıran şəxslərə Macarıstanda 10 illik bərpaolunan yaşama icazəsi sənədi almaq üçün müraciət etmək hüququ verir”, - deyə materialda bildirilir.
“Qızıl vizalar”ın verilməsi təcrübəsi Avropanın müxtəlif ölkələrində mübahisələr yaradır və son illər xüsusilə kəskinləşib. Belə ki, Portuqaliya daşınmaz əmlak alveri səbəbindən proqramı bağlayıb, Yunanıstanda isə viza almaq üçün zəruri investisiyaların dəyərini ikiqat artırıblar. Yaşama hüququ verən sənədin təqdim olunması üçün Türkiyədə də şərtləri sərtləşdiriblər.
Vüqar Seyidov
AZƏRTAC-ın xüsusi müxbiri
Budapeşt