Qohumunun avtomobilini söküb ehtiyat hissələrini satan şəxs saxlanılıb
Masallı, 6 may, Bağır Əliyev, AZƏRTAC
Masallı rayonunun Yeddioymaq kəndindəki yaşayış evlərindən birinin qarajında olan “VAZ-21074” markalı avtomobilin, ümumilikdə, 1500 manat dəyərində akkumulyator, 5 ədəd təkər, radiator və digər ehtiyat hissələrinin sökülərək oğurlanması barədə polisə müraciət daxil olub.
Daxili İşlər Nazirliyinin Mətbuat Xidmətinin Lənkəran regional qrupundan AZƏRTAC-ın bölgə müxbirinə verilən məlumata görə, Masallı Rayon Polis Şöbəsinin əməkdaşlarının keçirdikləri əməliyyat-axtarış tədbirləri nəticəsində oğurluğu törətməkdə şübhəli bilinən şəxs müəyyən edilərək saxlanılıb.
Araşdırmalarla onun zərərçəkmişin qohumu, Masallı rayonunun Yeddioymaq kənd sakini A.Ağayev olduğu və avtonəqliyyat vasitəsinin ehtiyat hissələrini söküb oğurladıqdan sonra satdığı müəyyən edilib.
Faktla bağlı araşdırmalar aparılır.
Bölmənin digər xəbərləri
