Qubada çaya aşan ekskavatorun sürücüsünün cəsədi aşkarlanıb
Quba, 21 fevral, Elxan Yusifli, AZƏRTAC
Vəlvələçayın Quba rayonu ərazisindən keçən hissəsində qazıntı işləri aparan ekskavatorun çaya aşması nəticəsində itkin düşən sürücü Vüqar Qasımovun cəsədi aşkarlanıb.
AZƏRTAC-ın bölgə müxbiri xəbər verir ki, Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupu mərhumun cəsədini itkin düşdüyü ərazidəki su hövzəsindən çıxararaq aidiyyəti üzrə təhvil verib.
Ekskavatorçunun meyitini su hövzəsini nasoslar vasitəsilə qismən boşaltdıqdan sonra tapmaq mümkün olub.
Xatırladaq ki, ekskavatorçu, Şabran rayon sakini Vüqar Qasımov fevralın 7-si səhər saatlarında baş verən bədbəxt hadisə nəticəsində suya düşmüşdü.
Vüqar Qasımov ailəli idi, üç övladı var.
Bölmənin digər xəbərləri
