Bakı, 8 fevral, AZƏRTAC

Təhsilin İnkişafı Fondunun dəstəyi, “Bir Könüllü” Tələbələrin Əməkdaşlığı İctimai Birliyinin təşkilatçılığı və “Bridge Academy” şirkətinin təlim tərəfdaşlığı ilə fevralın 3-dən 7-dək Qubada təşkil olunmuş maliyyə və iqtisadiyyat sahələri üzrə tələbələr üçün “WinterCamp 2023” qış düşərgəsi yekunlaşıb.

İctimai Birlikdən AZƏRTAC-a bildiriblər ki, düşərgədə iştirak etmək üçün 500-ə yaxın müraciət qeydə alınıb, qeydiyyat və müsahibə mərhələlərindən sonra 35 tələbə iştirak imkanı əldə edib.

Tədbirin açılışında İctimai Birliyin sədri Leyla Zeynalova qış düşərgəsinin tələbələrin asudə vaxtlarının daha səmərəli və faydalı təşkilinə şərait yaratmaq, əlaqəli ixtisaslar üzrə təhsil alan tələbələri dərsdən kənar mühitdə bir araya gətirərək onlar arasında kommunikasiyanın daha da möhkəmləndirilməsi, bilik və təcrübə mübadiləsinin artırılması və inkişaf etdirilməsi istiqamətində xüsusi rol oynayacağını vurğulayıb.

İlk spiker “Warwick Business School” məzunu, SOCAR, İqtisadi göstəricilər və maliyyə modelləşdirilməsi şöbəsinin əməkdaşı, iqtisadçı, müəllim Nuray İsgəndərovanın təqdimatında “Maliyyə uçotunun əsasları” mövzusu üzrə iki hissəli məlumat və təlim sessiyası keçirilib.

Düşərgənin ikinci günündə ikinci “Yüksəliş” müsabiqəsinin qalibi Hüseyn Mahmudovun və “The Bankers Club” un qurucusu və rəhbəri Rüfət Kərimovun təqdimatında “İqtisadiyyata giriş” və “Bank sektorunun iqtisadiyyatda rolu” mövzuları üzrə informativ sessiya və startap təlimləri təşkil edilib.

Növbəti günlərdə Böyük Britaniyanın Bristol Universitetinin məzunu, ikinci “Yüksəliş” müsabiqəsinin qalibi Elmir Hüseynov, Böyük Britaniyanın Lester Universitetinin məzunu, birinci Yüksəliş müsabiqəsinin qalibi Ziya Mürsəlzadə və Böyük Britaniyanın York və Fransanın Strasburq universitetlərinin məzunu, ikinci “Yüksəliş” müsabiqəsinin qalibi Əli Əhmədov, büdcə və maliyyə modelləri üzrə baş mütəxəssis Orxan Talıbzadə və Maliyyə Nazirliyinin əməkdaşı Elmar Hacıyevin təqdimatında “Azərbaycan vergi qanunvericiliyinə giriş”, “İdarəetmə uçotunun prinsipləri”, “Daxili auditə giriş”, “Maliyyə modelləri və şirkətin qiymətləndirilməsi” və “Maliyyə savadlılığının artırılması” mövzuları üzrə ikihissəli məlumat və təlim sessiyaları olub.

Sonra gənclər asudə vaxtın səmərəli və faydalı təşkili, həmçinin Qubanın əsrarəngiz təbiət mənzərələrini seyr etmək məqsədilə İkinci Nügədi kəndindəki Çənlibel gölünə səyahət ediblər.

Düşərgənin sonuncu günündə bağlanış mərasimində çıxış edən Elm və Təhsil Nazirliyinin İnformasiya və vətəndaşlara xidmət şöbəsinin sektor müdiri Səbuhi Rzayev gənc tələbələrin innovativ potensialını stimullaşdırmaq, onların elmi və nəzəri biliklərini artırmaq və bu istiqamətdə təcrübə mübadiləsini həyata keçirmək üçün peşəkar mütəxəssislərin, spikerlərin və təlimçilərin cəlb edilməsi ilə qış və yay düşərgələrinin mütəmadi təşkilinin əhəmiyyətindən bəhs edib.

Sonda təlim iştirakçılarına sertifikatlar, müxtəlif mükafatlar təqdim olunub.

Qeyd edək ki, düşərgə ərzində tələbələrin fiziki hazırlığını təmin etmək məqsədilə hər səhər məşqçi-müəllimlərin və idman mütəxəssislərinin dəstəyi ilə tələbələr üçün bir saatlıq bədən tərbiyəsi dərsləri keçirilib.

Axşam saatlarında isə asudə vaxtın səmərəli təşkili məqsədilə hər gün iştirakçılar arasında məşqçi-müəllimlərin müşayiəti ilə voleybol, stolüstü tennis yarışları davam edir.

Günün sonunda isə tələbələr üçün sənədli filmin nümayişi, müxtəlif əyləncəli oyunlar, maraqlı simulyasiya yarışları, intellektual fəaliyyətlər və sair təşkil olunub.