Qvardiola öz davamçısının kim olacağını müəyyənləşdirib
Bakı, 20 oktyabr, AZƏRTAC
“The Telegraph” nəşrinin məlumatına görə, ispan məşqçi bir müddət əvvəl davamçısının kim olacağını etiraf edib.
AZƏRTAC xəbər verir ki, “şəhərlilərin” indiki məşqçisi 2016-cı ildən “Etihad Stadium”da fəaliyyət göstərir. Onun müqaviləsi 2024-2025-ci il mövsümünədək nəzərdə tutulub və buna görə də indidən onun müqaviləni uzadıb-uzatmayacağını güman etmək çətindir.
İspan məşqçinin “Mançester Siti”dəki başlıca hədəfi Çempionlar Liqasında qələbə qazanmaq idi. O, bu məqsədə bir neçə ay bundan əvvəl nail ola bilib.
Nəşrin məlumatına əsasən, Qvardiola ötən mövsümdə “Brayton”la səfər oyunundan sonra klubun üç oyunçusu ilə görüşərək söhbət edib və Roberto De Dzerbini tərifləməyi də unutmayıb.
“Bu şəxs “Mançester Siti”nin növbəti məşqçisi olacaq”, - deyə o, oyunçulara bildirib və başı ilə “qağayıların” indiki baş məşqçisi tərəfə işarə edib.
Şənbə günü “Mançester Siti” İngiltərə Premyer liqası çərçivəsində yenidən “Brayton”la görüşməli olacaq.
Bölmənin digər xəbərləri
