RABİTƏ VƏ İNFORMASİYA TEXNOLOGİYALARI NAZİRİNİN STRASBURQA İŞGÜZAR SƏFƏRİ
Azərbaycanın Avropa Şurası yanındakı daimi nümayəndəliyindən AZƏRTAC-ın xüsusi müxbirinə bildirmişlər ki, fevralın 3-4-də Strasburqda Avropa Şurası İnformasiya Cəmiyyəti üzrə Çoxtərəfli Ekspert Komitəsinin müasir rabitə və informasiya texnologiyalarına həsr olunmuş yığıncağı keçirilmişdir. Yığıncaqda Azərbaycanın rabitə və informasiya texnologiyaları naziri Əli Abbasov “Keçid dövrünü yaşayan ölkələrdə elektron idarəetmə insan hüquqlarının qorunması vasitəsi kimi” mövzusunda çıxış edərək informasiya texnologiyalarının bugünkü dünyada sürətlə artmaqda olan rolundan, bunun inkişaf etməkdə olan və keçid dövrünü yaşayan ölkələr üçün doğurduğu çətinliklərdən və açdığı yeni imkanlardan, bu sahədə respublikamızda görülən işlər və əldə edilən nailiyyətlər barədə ətraflı məlumat vermişdir.
Səfər zamanı nazir Əli Abbasov Avropa Şurası baş katibinin müavini M.De Bur Bukikkio, siyasi məsələlər üzrə baş direktor K.Şuman, Cinayət Məsələləri Departamentinin rəhbəri M.Killerbi və iqtisadi cinayətkarlıq şöbəsinin müdiri C.Espozito ilə görüşlər keçirmişdir. Bu görüşlərdə Avropa Şurası və Azərbaycan arasında müvafiq sahədə əməkdaşlığın inkişaf etdirilməsi yolları, Azərbaycan tərəfindən İnformasiya Cəmiyyəti üzrə dünya zirvə toplantısının Tunis mərhələsinə hazırlıq komitəsinin üzvü qismində aparılan işlər müzakirə edilmişdir.
Görüşlərdə Azərbaycanın Avropa Şurası yanında daimi nümayəndəliyinin rəhbəri səfir Aqşin Mehdiyev iştirak etmişdir.
Bölmənin digər xəbərləri
