“RABİTƏBANK” ASC FƏALİYYƏTİNİN 15 İLLİYİNİ QEYD ETMİŞDİR
“Rabitəbank” ASC-dən AZƏRTAC-a bildirmişlər ki, qurum fəaliyyətinin 15 illiyini qeyd etmişdir.
1993-cü ildə Rabitə Nazirliyinin (indiki Rabitə və İnformasiya Texnologiyaları Nazirliyi) nəzdində ixtisaslaşdırılmış bank kimi fəaliyyətə başlamış “Rabitəbank”ın müştəriləri ticarət, istehsal, tikinti, kənd təsərrüfatı, nəqliyyat, kommunikasiya və başqa sahələri təmsil edən müəssisələrdir. Bank fiziki şəxslərə də bütün növ maliyyə xidmətləri göstərir.
Hazırda “Rabitəbank” 18 filialdan ibarət şəbəkə yaradaraq, Sumqayıt, Quba, Qusar, Xaçmaz, Lənkəran, Gəncə, Şəmkir, Şirvan, Şəki, Naxçıvan, Şamaxı və Kürdəmirdə təmsil olunur. Bankın müştərilərinin sayı 30 minə çatmışdır.
“Rabitəbank” əlavə maliyyə vəsaitləri cəlb etmək məqsədi ilə ABŞ və Avropanın investisiya fondları və iri bankları ilə əməkdaşlıq edir. 2007-ci ildə bank 5 milyon ABŞ dolları məbləğində korporativ istiqrazlarını, ilk dəfə olaraq, beynəlxalq maliyyə bazarında yerləşdirmişdir. Cari ilin birinci rübündə kiçik və orta sahibkarlığın maliyyələşdirilməsi məqsədi ilə “Rabitəbank” və ABŞ-ın “WorldBusiness Capital İnc” investisiya fondu arasında 10 il müddətinə 5 milyon dollar məbləğində kredit xəttinin açılmasına dair müqavilə imzalanmışdır.
2008-ci ilin birinci rübünün yekunlarına görə, bankın aktivlərinin məbləği 95 milyon manat, balans kapitalı 14 milyon manat, kredit portfeli 70 milyon manat, depozit portfelinin məbləği isə 72 milyon manat təşkil etmişdir.
