Azərbaycan Respublikasının Prezidenti İlham Əliyev daha sonra Heydər Əliyev parkında Ağdaş rayonunun bir qrup ziyalısı, ağsaqqalı və müharibə veteranı ilə çay süfrəsi arxasında görüşdü. 

Səmimi söhbət zamanı ağsaqqallar adından çıxış edən Rafiq Nəbiyev dövlətimizin başçısının Ağdaşa səfərini yüksək qiymətləndirdi, müstəqil Azərbaycanın memarı Heydər Əliyevin tarixi xidmətlərindən danışdı. O dedi ki, ulu öndər bizim üçün əbədiyaşar dövlət qurubdur. Təskinlik tapırıq ki, onun qurduğu dövlət Sizin kimi oğul tərəfdən daha da möhkəmlənir, güclənir və qüdrətlənir. Siz bizim fəxrimizsiniz. Siz xarici səfərlərinizdə bizə demokratiya dərsi keçənlərin, mədəniyyət öyrədənlərin hamısının dərsini verirsiniz. Biz bunu ürəkdən deyirik. Allah Sizi saxlasın, işinizi avand eləsin.

Dövlətimizin başçısı vurğuladı ki, Heydər Əliyevin davamçısı kimi, Prezident kimi bu, mənim borcumdur.

Ziyalılar adından Prezidentə minnətdarlığını bildirən Şah Səlimov 100 mindən çox əhalisi olan Ağdaş rayonunda son illər görülən quruculuq işlərində dövlətimizin başçısının rolunu yüksək dəyərləndirdi. O, ümummilli lider Heydər Əliyevin rayona dəfələrlə etdiyi səfərləri ilə bağlı xatirələrdən söhbət açaraq dedi ki, biz ulu öndəri ürəyimizdə və əməlimizdə yaşadırıq. Heydər Əliyev ağdaşlıların ən yaxın, sədaqətli dostu idi. Onun bizə verdiyi tövsiyələr yaxşı yadımızdadır. İndi rayonda geniş quruculuq işləri gedir və bu, hamıya xoş təsir bağışlayır. Bunun bünövrəsini qoyan məhz Heydər Əliyev olmuşdur. Onun məktəbinin yetirməsi Sizsiniz. Sizə bu çətin, şərəfli işdə uğurlar arzulayırıq, qədəmləriniz uğurlu olsun. Biz həmişə Heydər Əliyevi dəstəkləmişik, Sizi də dəstəkləyirik. Hər zaman Sizə arxayıq.

İLHAM ƏLİYEV: Xoş sözlərinizə görə çox sağ olun!

Mənim vəzifəm, borcum Azərbaycan xalqına xidmət etməkdir. Prezident seçkilərinə də bu məramla qatılaraq iştirak edirdim. Çünki mənim başqa amalım yoxdur. Regionların inkişafı, iqtisadiyyatın yüksəlişi, insanlarımızın daha da yaxşı yaşaması - bunlar prioritet məsələlərdir. Gündəlik fəaliyyətimdə bu məsələlər daim diqqət mərkəzindədir.

İlk növbədə, əlbəttə, gərək iqtisadiyyat daha da güclü inkişaf etsin. Heydər Əliyevin böyük əsəri olan neft kəmərinin tikintisi təkcə neft məsələsi deyil, bu, Azərbaycana böyük həcmdə vəsait, pul gətirəcəkdir. Biz gərək ondan səmərəli istifadə edək ki, ölkəmizin hər bir yeri, rayonu inkişaf etsin. İndi regionların inkişaf proqramı həyata keçirilir. İlk addımlardan biri bu idi. Çünki hamımız yaxşı bilirik ki, Bakı paytaxtdır. Bütün ölkələrdə paytaxta ən böyük diqqət göstərilir və demək olar ki, paytaxt hər bir ölkənin təcəssümüdür. Amma paytaxtla bölgələr arasında bu qədər fərq ola bilməz. Bu fəlsəfə Heydər Əliyevin fəlsəfəsidir. Bizim Azərbaycan xalqının tam əksəriyyəti bölgələrdə, rayonlarda yaşayır.

Mən xatırlayıram, bu gün mənə şəkil də verildi, 1981-ci ildə onunla bərabər Ağdaşa gəlmişdim. Onun həyatını görürdüm, Azərbaycan haqqında, gələcək haqqında fikirlərini görürdüm. O, bölgələrə, rayon camaatına bağlı idi. Mən şəhərdə doğulmuşam, böyümüşəm, məktəbə getmişəm və sonra Moskvada oxumuşam. Amma mənim də ürəyim buradadır. Regionların inkişafı sadəcə olaraq, abadlıq işlərinin görülməsi demək deyildir. Regionların inkişafı Azərbaycan xalqının tərəqqisidir, ölkəmizin güclənməsidir. İndi fərz etsək ki, biz buna diqqət yetirmirik, onda nə olacaq?! Bakı tərəqqi edəcək. Bəs bölgələr nə olacaq?! Buna imkan vermək olmaz. Mən bütün diqqətimi buna yönəldirəm.

Bakıda işlər gedir, orada da problemlər var. Onları da həll edirik. Amma bütün rayonları gəzirəm ki, özüm görüm, proqram necə icra olunur, hansı rayonda işlər necə gedir. Harada ki görürəm işlər yaxşı getmir, rəhbər işçiləri dərhal işdən götürürəm. Əgər işin öhdəsindən gələ bilmirsə, deməli, orada işləyə bilməz.

Mən bu gün Rafiq Niftəliyev barədə dedim. Xaçmazda da özünü yaxşı doğrultdu. Heydər Əliyev də onu Ağdaşa təyin etdi. Buradan da yaxşı sədalar, məlumatlar gəlir. Eşitmişdim ki, yaxşı işləyir. Buraya gəldim və görürəm ki, həqiqətən belədir. Əlbəttə, problemlər var. Bunlar hər bir ölkədə var, o cümlədən Azərbaycanda da. Başlıcası odur ki, problemlərə necə yanaşılır. İnsanlara necə münasibət göstərirsən. Diqqət göstərirsənmi, yoxsa yox. Elə rəhbər var ki, hesab edir, bütün dünya ona borcludur. Belə adamlar bizə lazım deyildir. Məni rayonlarda təmsil edən icra hakimiyyətinin başçılarıdır, yəni mənim birbaşa nümayəndələrimdir. Əgər icra hakimiyyətinin başçısı yaxşı işləmirsə, xalqın etimadını qazana bilməyibsə, deməli, istər-istəməz xalqın iqtidara münasibəti yaxşı ola bilməz.

Ona görə əgər biz Bakıda proqramlar həyata keçiririksə, gərək yerlərdə eyni həvəslə, bacarıqla bu məsələləri həll edək. İlk növbədə yoxsulluğun, işsizliyin azaldılması, enerji ilə, su ilə, qazla, istiliklə təminat və yeni iş yerlərinin açılması sahəsində tədbirlər görürük.

Əlbəttə, bu təməl 1990-cı illərin ortalarında qoyulmuşdur. Ondan əvvəl isə, 1970-ci illərdə qoyulmuşdur. Siz də bunu yaxşı bilirsiniz. Məhz o illərdə rayonlar inkişaf elədi. Sonra çətin bir dövr oldu, tənəzzül başladı. Səriştəsiz, bacarıqsız rəhbərlərin yarıtmaz siyasəti Azərbaycanı məhvə aparırdı, ölkə dağılmaq ərəfəsində idi, iqtisadiyyat çökürdü, hərc-mərclik, xaos var idi. Mən bunların aradan qaldırılması üçün Heydər Əliyev tərəfindən necə böyük səylər göstərildiyini çox yaxından görmüşəm. Təxminən 1990-cı illərin ortalarında artıq sabitləşmə yarandı və yavaş-yavaş inkişaf başlandı. Bu gün inkişaf sürətlə gedir. Eyni zamanda maaşların, minimum əmək haqlarının, pensiyaların qaldırılması vacibdir. Bunlar da iqtisadiyyatla bağlıdır. Çünki güclü iqtisadiyyat olmasa, heç nə olmaz.

Əfsuslar olsun ki, Azərbaycan uzun illər ərzində və elə indi də dünya birliyi tərəfindən o qədər də böyük diqqətlə əhatə olunmur. Biz görürük ki, başqa ölkələrə yardımlar da, kömək də göstərilir. Bizə gəldikdə isə, bunu görmürük. Ona görə gərək iqtisadiyyatımızı özümüz gücləndirək, özümüzə güvənək, heç kimdən yardım gözləməyək. Halbuki müstəqilliyimizin ilk illərində vəziyyət çox ağır idi.

Mən bu yaxınlarda qaçqınların və məcburi köçkünlərin problemlərinin həlli ilə bağlı müşavirə keçirdim. Bu sahədə də irəliləyiş var. Böyük bir dərddir - bir milyon insan evsiz-eşiksizdir, çadırda, yataqxanada, yararsız binalarda yaşayır. Bunları yerləşdirmək, normal şəraitlə təmin etmək üçün nə qədər vaxt və vəsait lazımdır. İlk illərdə bu vəsait yox idi. Haradan olsun ki, ölkə dağılırdı.

İndi biz neft strategiyasından söhbət açırıq. Əgər o vaxt müqavilə imzalanmasaydı, bugünkü uğurların biri də olmazdı. Ona görə də ardıcıl siyasət lazımdır. Düzdür, bu, vaxt aparır, vaxt da gedir. Amma bu siyasət öz bəhrəsini verir. Mənim başqa amalım yoxdur. Mənim əsas məqsədim xalqa xidmət etmək və əlimdən gələni etməkdir ki, daha da yaxşı olsun. Hər bir vətənpərvər insanın məqsədi olmalıdır. Vətənə bağlılıq, sevgi, məhəbbət hər birimizdə, xüsusilə gənc nəsildə olmalıdır. Gənc nəsil yeni şəraitdə, müstəqillik şəraitində formalaşır. Onlarda vətənpərvərlik ruhu güclü olmalıdır. Siz, müharibə veteranları onlar üçün nümunəsiniz, örnəksiniz.

ŞAH SƏLİMOV: Cənab Prezident, bizdən nə asılıdırsa, onu etməyə hazırıq.

Bir məsələ yadıma düşdü. Bilirsiniz ki, Xəzər İsayev bizim yerlimizdir. O, hər dəfə buraya gələndə yeni təkliflə çıxış edir. Əgər mümkünsə, Ağdaşda olimpiya kompleksinin tikilməsini nəzərdə tutmağınızı gənclər adından xahiş edirəm.

İLHAM ƏLİYEV: Yaxşı. Ağdaşda olmalıdır. Bilirsiniz ki, Prezidentin müavinləri yoxdur. Amma Xəzər İsayev Milli Olimpiya Komitəsində mənim müavinimdir.

RAFİQ NƏBİYEV: Cənab Prezident, ağdaşlılar həmişə Xəzər İsayevi töhmətləndirir, ondan nəsə umurlar. Belə olsa, onun canını bu töhmətdən qurtararsınız.

İLHAM ƏLİYEV: O, çox təvazökar adamdır. Mən ondan çox razıyam. Sizin rayona bundan sonra da gələcəyəm. Hər dəfə bu abadlıq, quruculuq işlərini görəndə ürəyim açılır. Sevinirəm ki, burada inkişaf gedir.

ŞAH SƏLİMOV: Cənab Prezident, inanın ki, bu quruculuq işləri ailələrə mədəni şəkildə daxil olmağa başlayıbdır. Bunu alqışlamaq lazımdır.

İLHAM ƏLİYEV: Sağ olun, salamat olun.