Rəcəb Tayyib Ərdoğan: Bu ilin sonunadək Türkiyədə bircə terrorçu da qoymayacağıq
Bakı, 14 may, AZƏRTAC
Hədəfimiz cümhuriyyətin 100-cü ili olan 2023-cü il bitmədən Türkiyədə əli qanlı bir terrorçu da qoymamaqdır.
AZƏRTAC xəbər verir ki, bunu Türkiyə Prezidenti Rəcəb Tayyib Ərdoğan İstanbul Sancaqtəpə mitinqində xalqa müraciətində deyib.
Ölkə daxilində terrorçuların mövcudluğuna son qoymaq nöqtəsinə gəlindiyini bildirən Türkiyə Prezidenti deyib: “Cudidə, Qabarda, Kandildə, Beslerderesində onları məhv etdik. Sərhədlərimiz xaricində də bu alçaqların nəfəs almasına imkan verməyəcəyik”.
Rəcəb Tayyib Ərdoğan qeyd edib ki, Türkiyə sərhədləri xaricində aparılan əməliyyatlar sayəsində terrorçular başlarını yuvalarından çıxara bilmirlər.
“Nə Afrini mayın 14-dən sonra geri alacaqlarını deyən separatçıların azğınlığı, nə Suriyadakı təhlükəsiz bölgələrimizi terrorçulara qızıl sinidə təqdim edəcəklərini vəd edənlərin qəfləti, nə də Şimali İraqdakı əsgərlərimizi geri çəkərək terror təşkilatına nəfəs aldıracaq layihələr, nə də körpə qatillərini sərbəst buraxmaq, 6-8 oktyabr hadisələrinin (2014-cü ildə YPG/PKK tərəfindən törədilmiş bu terror aktları nəticəsində iki polis və 37 mülki şəxs həlak olmuşdu - red.) təhrikçilərini küçəyə çıxarmaq planları bizi dayandıra bilməyəcək”, - deyə Türkiyə Prezidenti vurğulayıb.
Bölmənin digər xəbərləri
