Rektor: Yay məktəbləri gənclərin praktiki bacarıqlarının inkişafına töhfə verir
Bakı, 20 iyul, AZƏRTAC
Azərbaycanda elmin davamlı inkişafı və elmi məktəblərin gələcək nəsillərə ötürülməsi baxımından gənc alimlərin yetişdirilməsi strateji əhəmiyyət daşıyır. Uzun illər ərzində Azərbaycan elminin inkişafına mühüm töhfələr vermiş alimlər öz zəngin bilik və təcrübələrini gənclərlə bölüşüblər. Lakin zaman keçdikcə onların aktiv elmi fəaliyyət dövrü tədricən başa çatır və bu məsuliyyətli missiyanın yaradıcı düşüncəyə malik, yenilikçi baxışları ilə seçilən, təşəbbüskar və rəqabətqabiliyyətli gənc tədqiqatçılar tərəfindən davam etdirilməsi xüsusi əhəmiyyət kəsb edir.
AZƏRTAC xəbər verir ki, bu fikirləri Memarlıq və İnşaat Universitetinin (AzMİU) rektoru professor Gülçöhrə Məmmədova professor Məsud Əfəndiyevin Beynəlxalq Yay Məktəbinin açılış mərasimində çıxış edərkən söyləyib.
Rektor bildirib ki, professor Məsud Əfəndiyevin gənclərin elmi fəaliyyətə cəlb olunması, onların tədqiqat bacarıqlarının inkişaf etdirilməsi və beynəlxalq elmi mühitə inteqrasiyasına yönəlmiş təşəbbüsləri təqdirəlayiqdir. Alimin rəhbərliyi və dəstəyi ilə gənc tədqiqatçılar müxtəlif beynəlxalq konfranslarda, elmi seminarlarda və layihələrdə iştirak etmək imkanı qazanır, yeni elmi biliklərə yiyələnir və xarici ölkələrin aparıcı elm mərkəzləri ilə əməkdaşlıq əlaqələri qururlar. Professor Məsud Əfəndiyev yalnız alim kimi deyil, həm də gənclərin inkişafına xüsusi diqqət ayıran mentor və məsləhətçi kimi tanınır. O, gənc alimlərə elmi araşdırmaların planlaşdırılması, beynəlxalq layihələrdə iştirak, elmi məqalələrin hazırlanması və nüfuzlu elmi jurnallarda dərc olunması istiqamətində dəyərli tövsiyələr verir. Bu fəaliyyət nəticəsində gənclər öz elmi potensiallarını daha səmərəli şəkildə inkişaf etdirir, müasir elmin çağırışlarına uyğun tədqiqatlar aparmağa həvəslənirlər.
Professor Gülçöhrə Məmmədova qeyd edib ki, Azərbaycan Memarlıq və İnşaat Universitetinin prioritetlərindən biri tələbə və gənc tədqiqatçılar arasında elmə marağın artırılması, onların yaradıcı ideyalarının reallaşdırılması üçün müasir elmi mühitin formalaşdırılmasıdır. Bu istiqamətdə universitetdə elmi-tədqiqat fəaliyyətinin genişləndirilməsi, innovativ layihələrin dəstəklənməsi, gənc alimlərin qrant proqramlarına çıxış imkanlarının artırılması və beynəlxalq elmi əməkdaşlığın daha da inkişaf etdirilməsi məqsədilə ardıcıl və sistemli tədbirlər həyata keçirilir.
AzMİU-nun rəhbəri bildirib ki, son illər universitetdə müxtəlif elmi laboratoriyaların imkanları genişləndirilir, beynəlxalq tərəfdaş universitetlərlə birgə layihələr icra olunur, gənclərin elmi forumlarda, yay və qış məktəblərində, təlim proqramlarında və mübadilə layihələrində iştirakı üçün geniş imkanlar yaradılır. Eyni zamanda, elmə ayrılan maliyyə resurslarının artırılması, tədqiqat infrastrukturunun müasirləşdirilməsi və innovativ ideyaların kommersiyalaşdırılmasına dəstək göstərilməsi universitet rəhbərliyinin diqqət mərkəzində saxlanılır.
Çıxışının sonunda rektor vurğulayıb ki, təşkil olunan yay məktəbləri, elmi platformalar və intellektual müzakirə meydanları gənclərin yalnız nəzəri biliklərinin deyil, həm də praktiki bacarıqlarının inkişafına mühüm töhfə verir. Belə tədbirlər müxtəlif ali təhsil müəssisələri və elmi təşkilatlardan olan gənc tədqiqatçıların bir araya gələrək fikir mübadiləsi aparmasına, yeni elmi əlaqələr qurmasına, birgə layihələrin əsasını qoymasına və gələcək əməkdaşlıqların formalaşmasına şərait yaradır. Rektor bu təşəbbüslərin ölkədə elmi potensialın güclənməsinə, innovativ düşüncənin inkişafına və Azərbaycanın beynəlxalq elmi məkanda mövqeyinin daha da möhkəmlənməsinə mühüm töhfə verəcəyinə əminliyini ifadə edib.
Bölmənin digər xəbərləri
