RESPUBLİKAMIZIN RAYONLARINDA BARAMA TƏDARÜKÜNƏ BAŞLANILMIŞDIR

30.05.2006 [14:44]
Çap et
A⁺ A^-

“Şəki-İpək” Açıq Səhmdar Cəmiyyətindən AZƏRTAC-ın müxbirinə bildirmişlər ki, respublikamızın baramaçılıq rayonlarında məhsul tədarükünə başlanmışdır. Respublika üzrə tədarük məntəqəsinə ilk yaş barama məhsulu Zərdab rayonunun Seyidlər kənd sakini Əmir Qasımov tərəfindən təhvil verilmişdir. Kümdar mayın əvvəlində qəbul etdiyi bir qutu, yəni 19 qram ipəkqurdu toxumundan 77 kiloqram yüksək keyfiyyətli, I növ barama əldə etmişdir. Bu göstərici bir qutu toxum üçün nəzərdə tutulan orta məhsuldarlıqdan 27 kiloqram çoxdur.

Keyfiyyətli məhsul yetişdirib yüksək məhsuldarlıq əldə etdiyinə və respublika üzrə ilk məhsul təhvil verdiyinə görə “Şəki-İpək” ASC-nin rəhbərliyi kümdar Əmir Qasımovu rəngli televizorla mükafatlandırmışdır. Cəmiyyətin rəhbərliyi kümdarlara maddi maraq prinsipləri aşılamaq üçün gələcəkdə belə həvəsləndirmə metodlarından müntəzəm istifadə etməyi planlaşdırır.

Qeyd etməliyik ki, “Şəki-İpək” ASC-nin tam gücü ilə fəaliyyət göstərməsi üçün il ərzində 1000 tona yaxın yaş və ya 350 ton quru barama tələb olunur. Respublikamızın baramaçılıq rayonları ötən il yalnız 80 tona yaxın yaş barama tədarük edə bilmiş, xammalın böyük hissəsi Özbəkistandan gətirilmişdir. Bütün bunları nəzərə alan səhmdar cəmiyyətinin rəhbərliyi müəssisənin xammala olan tələbatını daxili imkanlar hesabına ödəmək və kombinatda fasiləsiz iş rejimini təmin etmək məqsədi ilə cari ildə baramaçılıq rayonları ilə işgüzar əlaqələri daha da genişləndirmişdir.

RESPUBLİKAMIZIN RAYONLARINDA BARAMA TƏDARÜKÜNƏ BAŞLANILMIŞDIR

MÜƏLLİFLƏ ƏLAQƏ

Bölmənin digər xəbərləri