Robert Katler: Qərbin inkişaf etmiş silahlarının İrəvana verilməsi regionda gərginliyi artıracaq
Bakı, 31 yanvar, AZƏRTAC
ATƏT-in Minsk qrupunun həmsədri kimi Fransanın Ermənistana izafi dəstəyi onun fəaliyyətini şübhə altına qoydu. Bununla Fransa özünün Cənubi Qafqazdakı rolunu gücləndirməyə çalışırdı.
AZƏRTAC xəbər verir ki, bu sözləri "Fransa və Ermənistan-Azərbaycan münaqişəsi” mövzusunda keçirilən beynəlxalq konfransın panel müzakirəsinə onlayn formada qoşulan Kanadanın Ottavadakı Karleton Universitetinin Avropa, Rusiya və Avrasiya Araşdırmaları İnstitutunun baş elmi işçisi Robert Katler söyləyib.
O bildirib ki, Fransanın getdikcə rolunu artırmağa çalışması, onun qeyri-obyektiv yanaşması maraqlı tərəflərdə narahatlıq yaradır.
“Fransanın, həmçinin Ermənistana iqtisadi dəstəyi, hərbi əməkdaşlığı Parisin birtərəfli yanaşmasının göstəricisidir. Eyni zamanda, hava hücumundan müdafiə sistemlərinin, gecəgörmə cihazlarının, “Bastion” zirehli maşınlarının və Qərbin inkişaf etmiş silahlarının İrəvana verilməsi regionda gərginliyi artıracaq. Bu gərginlik digər sahələrə də sirayət edəcək. Fransa Ermənistanın təhlükəsizliyini gücləndirməklə öz nüfuzunu artırmağa davam edərsə, Rusiya, Türkiyə və İran Parisin regiondakı təsirini azaltmağa çalışacaq”, - deyə Robert Katler vurğulayıb.
Bölmənin digər xəbərləri
