Rumıniya Konstitusiya Məhkəməsi prezident seçkilərinin nəticələrini təsdiqləyib
Bakı, 22 may, AZƏRTAC
Rumıniya Konstitusiya Məhkəməsi mayın 4-də və 18-də keçirilən prezident seçkilərinin nəticələrini təsdiqləyib.
AZƏRTAC “Agerpress” agentliyinə istinadla xəbər verir ki, Konstitusiya Məhkəməsinin təntənəli iclasında Rumıniyanın yeni seçilmiş Prezidenti Nikuşor Dan və dövlət başçısı səlahiyyətlərini icra edən İlie Bolojan iştirak ediblər.
Bundan sonra Rumıniya parlamentinin hər iki palatasının spikerləri yeni seçilmiş prezidentin and içməsi üçün 24 saat ərzində deputatları və senatorları birgə iclasa çağırmalıdır. Rumıniya dövlətinin yeni başçısının vəzifələrinin icrasına başladığı anlamına gələn andiçmə parlamentin xüsusi bəyannaməsində qeyd olunacaq.
Xatırladaq ki, mayın 18-də Rumıniyada keçirilmiş prezident seçkilərinin ikinci turunda Buxarest meri, müstəqil namizəd Nikuşor Dan 53,6 faiz səslə qalib gəlib. Onun əsas rəqibi - ultrasağçı “Rumınların Birləşməsi Uğrunda Alyans” partiyasının lideri Ceorce Simion isə seçicilərin yalnız 46,4 faizinin səsini toplaya bilib.
Bölmənin digər xəbərləri
