Rumıniyanın “Agerpres” agentliyi Sumqayıt hadisələri barədə yazır
Buxarest, 6 mart, AZƏRTAC
Azərbaycanın Rumıniyadakı səfirliyi Ermənistanın bu ölkədəki səfirliyinin Sumqayıt hadisələri barədə yalan məlumatlarına cavab olaraq geniş mətbuat açıqlaması yayıb. Açıqlama “Agerpres” milli xəbər agentliyinin internet səhifəsində yerləşdirilib.
Məlumatda bildirilir ki, Ermənistan tərəfindən Azərbaycana qarşı törədilmiş müharibə cinayətləri barədə kifayət qədər fakt var. Sumqayıt hadisələri Ermənistan və SSRİ xüsusi xidmət orqanları tərəfindən hazırlanaraq törədilmiş təxribat idi. Bu təxribata əl atmaqla sübut etməyə çalışdılar ki, ermənilərlə azərbaycanlıların birgə yaşaması mümkün deyil.
Qeyd edilir ki, ötən əsrin 80-ci illərində Ermənistan Azərbaycana qarşı təcavüzə başladı və bu hərbi təcavüz və Azərbaycanın dinc əhalisinə qarşı insanlığa qarşı cinayətlərlə yekunlaşdı. Ermənistanın terrorçu təşkilatları Azərbaycan əhalisinə qarşı terror aktları törədib. Bu təxribatların kulminasiya nöqtəsi isə Sumqayıt hadisələri oldu. Sumqayıtdakı iğtişaşlar əvvəlcədən hazırlanmış ssenari üzrə erməni separatçı qüvvələri tərəfindən törədilib. Hadisələrin həqiqi mahiyyəti üzə çıxıb, iğtişaşların sovet rəhbərliyində təmsil olunmuş ermənipərəst qüvvələrin göstərişi ilə əvvəlcədən hazırlanmış ssenari üzrə erməni separatçı qüvvələri tərəfindən törədildiyi müəyyən edilib.
İqbal Hacıyev
AZƏRTAC-ın xüsusi müxbiri
Buxarest
Bölmənin digər xəbərləri
