RUSİYA FEDERAL MƏDƏNİYYƏT VƏ KİNEMATOQRAFİYA AGENTLİYİNİN RƏHBƏRİ MİXAİL ŞBIDKOYUN ÇIXIŞI
- Çox hörmətli İlham Heydəroviç, cənab Prezident!
Siz gözəl bilirsiniz ki, mədəniyyət sahəsində Rusiya-Azərbaycan münasibətləri, əslində, heç vaxt ara verməmişdir. Burada əsas rolu Heydər Əliyev oynamışdır, çünki o, mədəniyyətin ölkələrimiz arasındakı münasibətlərdə nə kimi rol oynadığını çox gözəl bilirdi. Siyasi toqquşmaların yaranmasından, siyasi münasibətlərdə hansı incə məqamların meydana çıxmasından asılı olmayaraq, mədəniyyət zəminində hər şey çox sadə olmasa da, hər halda, asan həll olunurdu. Əlbəttə, dəyişməz nazir Polad müəllimin Moskvada hamını yaxşı tanıması və Moskvadakıların onu yaxından tanımaları da çox ciddi rol oynamışdı. Ona görə də münasibətlər həmişə yüksək etimad əsasında qurulurdu və əlbəttə ki, Moskvadakı Azərbaycan diasporunun yüksək nüfuzu, - bu da çox vacibdir, - həm əlaqələrimizin inkişafında, həm də Rusiya və Azərbaycan mədəniyyətlərinin inkişafında da çox mühüm rol oynamışdır.
Düşünürəm ki, indi Azərbaycanda bu münasibətləri genişləndirməyə imkan verən şərait yaradılır. Filarmoniyanın, opera teatrının binalarının bərpa edilməsi, regionlarda görülən işlər, - təəssüf ki, son vaxtlar rayonlara getməyə imkanım olmayıb, ancaq mənə deyiblər ki, Lənkəranda teatr binasının bərpası başa çatdırılmışdır, Şəkidə çox gözəl teatr vardır, - belə deməyə əsas verir. Mən respublikanızın nailiyyətlərindən Sizə danışmayacağam, lakin bizim üçün bu nailiyyətlər vacibdir. Əgər əvvəllər biz, əsasən, Bakı ilə münasibətlərə istiqamət götürürdüksə, bu gün aydındır ki, ən müxtəlif imkanlar mövcuddur. Fevralın 16-da biz Rusiyada Azərbaycan ilinə başlayırıq və o, Kreml sarayında Azərbaycan mədəniyyət xadimlərinin böyük konserti ilə başlanacaqdır. Biz bütün il üçün Azərbaycan kollektivlərinin çox ciddi, geniştərkibli qastrollarını planlaşdırmışıq. Zənnimcə, İTAR-TASS və digər kütləvi informasiya vasitələri ilə çox sıx əməkdaşlıq şəraitində işləməyimiz də, - burada mədəniyyət barədə çox yazan qəzetlərin baş redaktorları iştirak edirlər,- bizim münasibətlərimizə yeni təkan verəcəkdir, bu il və Rusiya mədəniyyətinin Azərbaycanda təmsil olunacağı növbəti il bizim üçün yeni imkanlar açır.
Təbii ki, biz Polad Bülbüloğlunun yubileyini qeyd etmək fürsətini əldən verməyəcəyik. Mən hazırda gənc nəsli bunun üçün hazırlayıram. Sizə yalnız bircə şey deyim: yeni il proqramı hazırladığım zaman təsadüfən, - Moskvada Mahmud Esembayevin xatirəsinə həsr olunmuş konsert var idi, - Poladı dəvət edə bildim və o, orada popurri ifa etdi. Bundan sonra mənə aramsız telefon zəngləri edilirdi. Eləcə də, Böyük Teatrın səhnəsində Qara Qarayevin “Yeddi gözəl” baleti göstəriləndən sonra reaksiya heyrətamiz idi. Mən bütün bunları böyük məmnunluqla qəbul edirəm və deməliyəm ki, qarşılıqlı səfərlərimiz bizim üçün olduqca xoşdur.
İLHAM ƏLİYEV: Çox sağ olun. Mən sizinlə tamamilə razıyam ki, mədəni əlaqələr, əslində, bir saniyə, bir gün belə qırılmamışdır. Bu əlaqələr elə möhkəmdir və qarşılıqlı surətdə elə sıx bağlıdır ki, istəsək də onları qıra bilmərik. Biz çox şadıq ki, indi bu əlaqələr möhkəmlənir və bu işdə sizin xidmətləriniz çox böyükdür. Siz Azərbaycana çox tez-tez gəlmisiniz və gəlirsiniz. Biz sizin maraqlı verilişləri çox sevirik və televiziya ilə onlara baxırıq. İstəyirik ki, bu əlaqələr mədəni həyatın müxtəlif sahələrində daha da möhkəmlənsin. Əlbəttə, Rusiya mədəniyyət ustaları kommersiya səviyyəsində, qastrola çox gəlirlər, Rusiya vilayətlərinin nümayəndələri Mədəniyyət günləri çərçivəsində gəlirlər. Rusiya televiziyasının verilişlərinə də baxırıq. Sizin dediyiniz kimi, infrastrukturun yaradılmasına böyük diqqət yetirməyə çalışırıq, çünki incəsənət xadimlərinin özlərini yaxşı, rahat hiss etməsi, yaxşı şəraitdə işləməsi rəhbərlikdən, hökumətdən, dövlətdən asılıdır. Regionlardakı teatrlar modernləşdirilir. Bakıda da onların bərpa edilməsinə ehtiyac var, çünki bəziləri bir qədər köhnəlmişdir. Odur ki, mən Nazirlər Kabinetinə Bakı şəhərindəki bütün teatrların tam bərpası proqramını hazırlamağı tapşırmışam. Biz muzeylər üzrə belə proqramı həyata keçirməyə artıq başlamışıq. Muzeylərimizi təkcə təmir, dizayn, interyer baxımından deyil, həm də dünyada mövcud olan müasir muzey texnologiyaları baxımından dünya standartlarına tam uyğunlaşdıracağıq.
Teatrlar üzrə də bu cür proqram gözlənilir və onu həyata keçirəcəyik. Biz mədəniyyət xadimlərinə maddi cəhətdən də kömək etməyə çalışırıq. Heç kim üçün sirr deyil ki, formasiya dəyişdikdən sonra humanitar sahə, necə deyərlər, arxa planda qalmışdı. Yəqin ki, obyektiv səbəblər olmuşdur, çünki hər bir ölkə, ilk növbədə, iqtisadi vəziyyətini yaxşılaşdırmaq haqqında düşünürdü. Belə ki, iqtisadiyyatdakı böhran vəziyyəti hamı üçün - Azərbaycan, Rusiya və digər qonşularımız üçün səciyyəvi idi. Humanitar sahə, bir növ ikinci plana keçmişdi. Mədəniyyət xadimləri həmişə xüsusi üstünlüklərdən, imtiyazlardan istifadə etmiş, ehtiram sahibi olmuşlar. Əlbəttə, onların maddi vəziyyəti də ağırlaşmışdı. Odur ki, Azərbaycanda mədəniyyət xadimlərinin böyük bir qismi üçün aylıq Prezident təqaüdü təyin edilmişdir. Bu təqaüdü alanların sayı ildən-ilə artır və onları maddi cəhətdən müəyyən qədər dəstəkləmək üçün məbləğ də az deyildir. Çünki bu adamlar bizneslə məşğul ola bilmirlər, onların başqa imkanları yoxdur. Onların bizneslə məşğul olması lazım da deyildir. Bacardıqları işlə məşğul olması, peşəkarlıqlarını nümayiş etdirməsi lazımdır.
Əlbəttə, hər şey yenə də iqtisadi imkanlardan asılıdır. Əgər ölkədə vəsait varsa, əlbəttə ki, ondan istifadə olunur. Odur ki, indi biz bütün səylərimizi belə güclü iqtisadi baza yaradılmasına yönəldirik. Mən həyatdakı, iqtisadi inkişafdakı özəl sektorun rolundan artıq danışmışam. Əgər büdcəmizə nəzər salsaq görərik ki, vəsaitlərin əsas hissəsi sosial proqramlara yönəldilmişdir. Bu, əmək haqqı, pensiyalar, müavinətlərdir. Bazar iqtisadiyyatı sosial proqramları rədd etmir, əksinə, bu proqramları, o cümlədən də humanitar, mədəniyyət sahələrində daha çox həyata keçirməyə imkan verir.
Biz Rusiyada Azərbaycan günlərinin başlanmasını səbirsizliklə gözləyirik. İlk dəfə keçiriləcək bu tədbir böyük hadisə olacaq, əvvəllər belə hal olmamışdır. Mədəniyyət günləri keçirilirdi, lakin bir ölkədə digər ölkənin Günlərinin keçirilməsi həyatımızda yeni mərhələdir.
Bölmənin digər xəbərləri
