RUSİYA İDMAN FEDERAL BƏDƏN TƏRBİYƏSİ, İDMAN VƏ TURİZM AGENTLİYİNİN RƏHBƏRİ VYAÇESLAV FETİSOVUN ÇIXIŞI
- Hörmətli cənab Prezident!
Burada, Bakıda olmaq mənim üçün böyük şərəfdir. İlk təəssüratımı bölüşmək istərdim. Təyyarəmiz gecə burada yerə enəndə Amerikada doğulan qızım dedi ki, bura Nyu-Cersiyə bənzəyir. Bakıya gələndə isə dedi ki, bu şəhər ona Parisi xatırladır. Şəhər həqiqətən gözəldir, lakin onun ən böyük sərvəti insanlardır. Bu gün həmkarlarımızla ünsiyyətdə olduq, idman obyektlərinizin hamısına getdik. Deməliyəm ki, hətta sözün yaxşı mənasında həsəd də apardıq. Bütün obyektlər yüksək texnologiya əsasında tikilmişdir, müasir tələblərə cavab verir, sanki qələbə qazanmaq məqsədi ilə yaradılmışdır. Karvansarada bizi böyük qonaqpərvərliklə qarşıladılar. Mənim üçün yeganə problem xokkey mövzusunun müzakirəsi oldu. Ümidvaram ki, bu respublikada xokkey inkişaf edəcəkdir və mən bu baxımdan kömək etməyə hazıram. Burada insanlar ötən əsrin 50-ci illərindən bəri bizim əfsanəvi yığma komandamızı xatırlayırlar. Deyirlər, yadındadırmı, 1978-ci ildə sən səhv etdin və bizə az qala qol vurmuşdular. Biz, əlbəttə, bütün bunları xatırlayırıq. Təəssüratımız olduqca çoxdur və burada keçirilən günlərin ən böyük mənası insani ünsiyyətlərdir.
Bildirmək istəyirəm ki, ölkələrimizdə idmanın inkişafı ilə bağlı ümumi sistemimiz vardır. Deməliyəm ki, siz bu sahədə daha irəli getmisiniz, çünki idmana rəhbərlik bir əldə cəmlənmişdir və bu da postsovet məkanının bəzi ölkələrində mövcud olan ziddiyyətləri aradan qaldırır. Ona görə də sizdə tərəqqi hiss olunur, böyük perspektiv vardır. Bu gün həmkarımla bədən tərbiyəsi və idmanın kütləvi səviyyədə inkişafının necə vacib olduğunu müzakirə etdik. Zənnimcə, özlüyündə zəruri olan islahat, yəni ümumtəhsil məktəblərində, ali təhsil müəssisələrində idmanın inkişafı alkoqolizm, narkomaniya, uşaq cinayətkarlığı kimi sosial problemlərin həlli deməkdir. Hesab edirəm ki, aramızda anlaşma var və təcrübə mübadiləsi aparacaq, qarşılıqlı fəaliyyət göstərəcəyik. Ümidvaram ki, ünsiyyət üçün geniş imkanlarımız vardır. Biz bir sıra kütləvi yarışlar zamanı birgə toplanışlar keçirmişik. Anlaşma vardır, biz bir dildə danışırıq.
Bu gün burada olmaq mənə çox xoşdur. Ümidvaram, əlaqələrimiz davam edəcək, artacaq və biz birlikdə qələbələr qazanacağıq. Çox sağ olun.
İLHAM ƏLİYEV: Sağ olun, siz yalnız Bakıdakı idman komplekslərində olmusunuz. Demək istəyirəm ki, son 4 il ərzində respublika ərazisində, bölgələrdə 10-dan çox müasir idman bazası tikilmişdir. Orada mehmanxanalar, hovuzlar, idmanla məşğul olmaq üçün hər cür şərait vardır. Çünki hər bir ölkədə olduğu kimi, istedadların əksəriyyəti ucqar yerlərdədir. Əgər idmanla məşğul olmaq imkanı yoxdursa, onda bu istedad özünü göstərməyəcəkdir. Biz buna xüsusi diqqət yetiririk, çünki bu, təkcə idmanda uğurlar və medallar deyil, həm də millətin, gələcək nəslin sağlamlığı, gənclərin normal həyat tərzidir. Mən özüm səkkiz ildir Azərbaycan Olimpiya Komitəsinə başçılıq edirəm və Azərbaycan Prezidenti seçildikdən sonra da bu vəzifəni heç kimə vermədim, bu vəzifədən getmədim və getməyəcəyəm.
Ona görə ki, bu vəzifə mənim üçün çox əzizdir və bu sahədə çox iş görmək olar. Özü də məhz gənc nəslin yaramaz işlərlə məşğul olmaması, narkotik vasitələrdən, spirtli içkilərdən istifadə etməməsi üçün. Gənclərin hərtərəfli inkişafı üçün alternativ yaratmaq lazımdır.
Xokkeyə gəldikdə isə, həmin nöqsanı bu il aradan qaldıracağıq. Büdcəmizdə xokkey meydançasının bərpası üçün vəsait nəzərdə tutulmuşdur. Bizim böyük idman sarayının yanında xokkey stadionu da tikilmişdir. Bu obyektin tikintisini Heydər Əliyev başlamış və başa çatdırmışdı. Sonra hər şey dəyişməyə başladıqda, obyekt yada düşmədi. Sovet İttifaqı dağıldı və əlbəttə, bu işə heç kəs diqqət yetirmədi. Meydança qaldı, lakin orada buz örtüyü yaranmadı. Ona görə də bu il qərara gəldik ki, bizim xokkey stadionumuz olacaq, xokkey komandası yaradacağıq. Ola bilər, bu, kiməsə qeyri-ciddi görünəcək - Azərbaycan və xokkey. Lakin ümidvaram ki, biz burada da uğurlar qazanacağıq, sizi də bizim xokkeyin səviyyəsi ilə tanış olmağa dəvət edəcəyik. Amma yəqin ki, bu, iki ildən tez olmayacaqdır.
VYAÇESLAV FETİSOV: Məşqçi lazım olsa, mən hazıram.
Bölmənin digər xəbərləri
