Rusiyada uşaqların xaricə aparılması qaydalarına dəyişiklik edilib
Moskva, 10 iyun, AZƏRTAC
Rusiya Federal Təhlükəsizlik Xidmətinin Sərhəd Xidməti iyunun 12-dən uşaqların xaricə aparılması qaydalarının dəyişdiyini bildirib.
AZƏRTAC xəbər verir ki, yetkinlik yaşına çatmamış Rusiya vətəndaşlarının ölkədən çıxmasına icazə verilməməsi haqqında ərizələrin təqdim olunması qaydası dəyişib. İndi bu barədə ərizə yetkinlik yaşına çatmamış vətəndaşın özünün, yaxud valideynlərindən birinin və ya himayədarının yaşadığı ərazi üzrə miqrasiya orqanına, eləcə də ərizəçinin daimi yaşadığı ölkədə Rusiya diplomatik nümayəndəliyinə və konsulluğuna təqdim edilməlidir.
Əvvəllər yetkinlik yaşına çatmamış Rusiya vətəndaşının ölkədən çıxarılmasına icazə verməyən valideyn sərhəd xidməti orqanlarına da müraciət edə bilərdi. Bu il təsdiq olunmuş yeni qaydalarda sərhəd xidməti orqanları siyahıdan çıxarılıb. Bununla əlaqədar, sərhəd xidməti orqanları yetkinlik yaşına çatmamış vətəndaşın ölkədən çıxarılmasına icazə verilməməsi haqqında ərizə qəbul etməyəcək.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
