Mariela Modeva: Bolqarıstan ilə dost Azərbaycan arasında turist axınının artacağına ümid edirik
Ankara, 23 iyun, AZƏRTAC
Bolqarıstanda dost Azərbaycanı sevir və hörmət edirlər. Biz qarşılıqlı səfərlərin artmasına ürəkdən ümid edirik. İnanırıq ki, turizm insanları bir araya gətirmək və bunun vasitəsilə bir-birini daha yaxşı başa düşmək üçün güclü bir alətdir.
Bu barədə AZƏRTAC-a müsahibəsində ölkəsinin turizm imkanlarını təqdim etmək üçün Ankaraya gələn Bolqarıstanın turizm nazirinin müavini, professor Mariela Modeva bildirib.
Nazir müavini bu yaxınlarda Sofiyadakı Azərbaycan səfirliyinə dəvət olunduğunu və orada Azərbaycan qastronomiyasına dair təqdimatın keçirildiyini bildirib. “Çox müsbət, xoş ab-hava var idi”, - deyə Modeva bildirib və dost Azərbaycan sakinlərinin Bolqarıstanın turizm imkanları ilə tam tanış ola bilməsi üçün diplomatik nümayəndəliyə ingilis dilində elektron kitab bağışladığını əlavə edib.
“Bu gün Bolqarıstan, xüsusən də il boyu fəaliyyət göstərən sağlamlıq turizmi sektorunda istirahət üçün hər cür imkanı təqdim edir. Əminəm ki, bu, dost ölkənin sakinləri üçün maraqlı olacaq”, - deyə nazir müavini bildirib.
Viza seçimlərinə gəldikdə, nazir müavini xatırladıb ki, Bolqarıstan elə bu yaxınlarda Şengen zonasına qoşulub. O əlavə edib: “Sofiya Avropa İttifaqının tənzimləyici çərçivəsinə uyğun olaraq bir sıra öhdəliklər götürüb. Buraya, xüsusən də ölkədən gəliş və gediş zamanı biometrik məlumatların toplanması üçün informasiya sistemi də daxildir. Bu sistem bəzən prosesləri ləngidir və bizim Turizm Nazirliyi qonaqların sənədlərinin rəsmiləşdirilməsi prosesini sürətləndirmək məsələsini gündəliyə daxil edib. Artıq Bolqarıstan Xarici İşlər Nazirliyinin nümayəndələrinin də daxil olduğu müvafiq işçi qrupu yaradılıb”, - deyə o qeyd edib.
Nazir müavini qeyd edib ki, turistlərin biometrik məlumatlarının üç il ərzində məlumat bazalarında saxlanıldığını nəzərə alsaq, Bolqarıstana giriş prosesinin zamanla sadələşdiriləcəyinə əmin olmaq mümkündür. “Sistemin tətbiqinin ilkin dövrü çətin ola bilər, amma gələcəkdə vəziyyət yaxşılaşacaq”, - deyə o bildirib.
M. Modeva, həmçinin Azərbaycandan olan turistlər də daxil olmaqla, ölkəyə gələn əcnəbilərin səyahətini asanlaşdıracaq Aİ elektron vizalarının (e-vizalar) tezliklə tətbiqi ilə bağlı planlarını da bölüşüb.
Turizm nazirinin müavini Bolqarıstana çoxdəfəlik, “kaskad” adlanan vizaların verilməsinin turizmə də təsir göstərəcəyini istisna etməyib. Onun sözlərinə görə, əgər turist həqiqidirsə, o, ilkin olaraq 90 gün, daha sonra isə bir il, hətta üç-beş il müddətinə viza ala biləcək. Bu baxımdan, turistlərin özlərinin məsuliyyətlə davranması çox vacibdir.
Balkan yarımadasındakı bir neçə ölkəni əhatə edən regional turizm marşrutlarının inkişafına gəldikdə, nazir müavini qeyd edib ki, Şengen zonasının üzvü olan Bolqarıstan Aİ-yə daxil olmayan ölkələrə səfər etmək təşəbbüslərinin əhatə dairəsindən kənarda qalır. O əlavə edib: “Eyni zamanda, ikitərəfli müqavilələr turizm üçün geniş imkanlar təqdim edir. Məsələn, Bolqarıstanın Türkiyə ilə vizasız rejim müqaviləsi var”.
Qara dənizdəki Bolqarıstan limanlarında kruiz turizminin perspektivlərinə gəldikdə isə, nazir müavini bunun razılıq məsələsi olduğunu qeyd edib. “Bu gün İstanbul ilə Bolqarıstan sahilləri arasında bərə xidməti layihəsi artıq mövcuddur. Əminəm ki, gələcəkdə müxtəlif Qara dəniz təşəbbüsləri də reallığa çevriləcək. Bunun əsas şərti regionda sülhün olmasıdır”, - deyə o vurğulayıb və turizmi xalqlar arasında dialoq üçün vacib alət adlandırıb.
Bölmənin digər xəbərləri
