Ötən il Şəkiyə 3,5 milyon manatdan çox investisiya qoyulub
Qax, 23 iyun, AZƏRTAC
Şəki tütün əkininə, quru tütün istehsalına və eləcədə hər hektardan orta məhsuldarlığa görə respublikamızda birinci yeri tutur. Ötən il 1805 hektar tütün əkinindən 5,4 min ton quru tütün istehsal olunub, bu il isə 1850 hektar sahədə tütün əkilib.
AZƏRTAC-ın bölgə müxbiri xəbər verir ki, bunu Qax rayonunda keçirilən “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın müzakirəsi ilə bağlı regional müşavirədə çıxışı zamanı Şəki Şəhər İcra Hakimiyyətinin başçısı Elxan Usubov deyib.
Onun sözlərinə görə, bu il rayonda quru tütün istehsalının 6 min tona çatdırılması proqnozlaşdırılır.
“Ötən il rayonumuzda 1282 ton vələmir, 1893 ton qarğıdalı, 615 ton paxlalılar, 9300 ton kartof, 18981 ton tərəvəz, 2864 ton bostan, 25967 ton meyvə, 4589 ton üzüm və sair məhsullar istehsal olunub ki, bu da əvvəlki illərlə müqayisədə xeyli çoxdur. Hazırda rayonda 51 min 120 baş iribuynuzlu, 136 min 752 baş xırdabuynuzlu heyvanlar və 274 min 437 baş ev quşları, 13 min 434 arı ailəsi saxlanılır. Bu sahələrdə də əldə olunan nailiyyətlər əvvəlki illə müqayisədə əhəmiyyətli dərəcədə artıb”, - deyə Elxan Usubov vurğulayıb.
Son zamanlarda Şəkidə 61 milyon 948 min manat həcmində ümumi özəl investisiya layihələri həyata keçirildiyini vurğulayan icra başçısı 2025-ci ildə isə özəl investisiya qoyuluşunun 3 milyon 549 min manat olduğunu sözlərinə əlavə edib: “Həyata keçirilən layihələr çərçivəsində 431 yeni iş yerləri açılıb. Bu toplantıda Şəki rayonunun 2026-2030-cu illər üçün sosial-iqtisadi inkişafı məqsədilə ümumilikdə 15 milyon manat, o cümlədən xarici investisiyaların da cəlb edilməsi istiqamətində işlərin davam etdirilməsi nəzərdə tutulur”.
Müxbir – Mustafa Dadaşov
Bölmənin digər xəbərləri
