İtaliya anomal istilər səbəbindən iş rejimi və əməkhaqqı dəstəyi tədbirlərini bərpa edib
Bakı, 23 iyun, AZƏRTAC
ANSA xəbər agentliyinin çərşənbə axşamı verdiyi məlumata görə, İtaliya Avropada artan isti hava dalğası ilə əlaqədar iş dayandırma qaydalarını və əməkhaqqı dəstəyi tədbirlərini bərpa edib.
AZƏRTAC xəbər verir ki, ANSA-nın İtaliya Baş nazirinin ofisinə istinadla yaydığı məlumata görə, Nazirlər Şurası tərəfindən təsdiqlənmiş infrastruktur fərmanı əvvəlki illərdə qüvvədə olan qaydaları yenidən tətbiq edir.
Fərman bəzi şirkətlərə həddindən artıq isti havalarda işləri dayandırmağa və ya azaltmağa icazə verir və işçilərə müvəqqəti istisnalar vasitəsilə əməkhaqqı dəstəyi sxemlərinə çıxış imkanı yaradır.
Çərşənbə axşamı günü İtaliyada “qırmızı” səviyyəli istilik xəbərdarlığı verilib. Paytaxt Roma, Florensiya və Milan kimi şəhərlər də daxil olmaqla bir çox ərazidə temperaturun daha da yüksəlməsi gözlənilir.
“Sky Tg24”ün məlumatına görə, həftəsonu Parmada mindən çox insan təcili yardım şöbələrinə müraciət edib, şənbə günü isə pik həddə - 370 müraciət daxil olub. Milanda elektrik şəbəkəsində gərginliyin azalması qeydə alınıb. Berqamo və Turin şəhərlərində kondisionerdən istifadənin və yüksək temperaturun infrastruktura yaratdığı stres səbəbindən elektrik enerjisinə tələbatın artması fonunda müvəqqəti elektrik kəsintiləri baş verib.
Bölmənin digər xəbərləri
