Şotlandiya Milli Partiyasının sabiq icraçı direktoru mənimsəmə faktına görə həbs edilib
London, 23 iyun, AZƏRTAC
Şotlandiya Milli Partiyasının (SNP) sabiq icraçı direktoru Piter Merrell partiya vəsaitlərini mənimsədiyini etiraf etdikdən sonra 5 il 3 ay müddətinə azadlıqdan məhrum olunub.
AZƏRTAC BBC-yə istinadla xəbər verir ki, 61 yaşlı Piter Merrell məhkəmə qarşısında 2010–2022-ci illər ərzində SNP-yə məxsus 400 min funt sterlinqdən çox vəsaiti mənimsədiyini etiraf edib. Məhkəmənin qərarı elan olunarkən onun heç bir reaksiya vermədiyi, daha sonra isə qandallanaraq zaldan çıxarıldığı bildirilir.
İstintaq materiallarına əsasən, o, mənimsədiyi vəsait hesabına avtomobillər, məişət əşyaları, mətbəx ləvazimatları və gigiyena məhsulları da daxil olmaqla müxtəlif alış-verişlər edib. Alınan ən bahalı əşyalardan biri 124 min 550 funt sterlinq dəyərində motorhom olub. Həmin nəqliyyat vasitəsi satın alındıqdan üç il sonra Merrellin anasının evində aşkar edilərək müsadirə olunub.
Qeyd edək ki, Piter Merrell uzun illər SNP-nin icraçı direktoru vəzifəsində çalışıb və partiyanın keçmiş lideri, Şotlandiyanın sabiq birinci naziri Nikola Stercanın həyat yoldaşıdır.
Bölmənin digər xəbərləri
