ABŞ hərbi bazası Polşaya 3,2 milyard dollara başa gələcək
Bakı, 23 iyun, AZƏRTAC
Polşa ərazisində daimi ABŞ hərbi bazasının mümkün tikintisi Polşaya təxminən 12 milyard zlotıya (təxminən 3,2 milyard dollar) başa gələcək.
AZƏRTAC xəbər verir ki, bu barədə “Wirtualna Polska” portalı Polşa hökumətindəki mənbələrə istinadla məlumat yayıb. Portal qeyd edir ki, daimi ABŞ bazası ya Poznan bölgəsində, ya da Vrotslav yaxınlığında sıfırdan tikiləcək. Bu yerlərin seçilməsi orada böyük aerodromların olması ilə bağlıdır.
Amerika hərbçilərinin ailə üzvlərinin onlarla birlikdə Polşaya gəlməsi planlaşdırılır. Buna görə də baza təxminən 25 min nəfəri yerləşdirmək üçün bütün zəruri infrastrukturla təchiz olunmalıdır. Onlardan 11-15 minini ABŞ hərbi qulluqçuları təşkil edəcək.
Hazırda Polşada təxminən 10 min Amerika əsgəri rotasiya əsasında yerləşdirilib. Prezident Donald Tramp seçki kampaniyasını dəstəklədiyi hazırkı Polşa Prezidenti Karol Navrotskinin yenidən seçilməsi fonunda ABŞ-nin Polşaya əlavə 5 min əsgər göndərəcəyini açıqlayıb.
İyunun 3-də Polşa müdafiə naziri Vladislav Kosinyak-Kamış amerikalı həmkarı Pit Heqsetə Polşada yeni daimi ABŞ hərbi bazasının yaradılması ilə bağlı rəsmi təklif təqdim edib.
Bölmənin digər xəbərləri
