Rusiyalı senator Azərbaycana səfərinə yekun vurub
Moskva, 11 dekabr, AZƏRTAC
Rusiya Federasiyası Federasiya Şurasının beynəlxalq məsələlər Komitəsinin sədri Qriqori Karasin Azərbaycana səfərinə yekun vurub.
AZƏRTAC xəbər verir ki, rusiyalı siyasətçi özünün teleqram kanalında Rusiya-Azərbaycan parlamentlərarası komissiyasının iclasının keçirilməsindən bəhs edib. O yazıb: “Bakıdan qayıtdıq. Orada Rusiya-Azərbaycan parlamentlərarası komissiyasının yubiley 20-ci iclası keçirildi. Tədbir ən mühüm ikitərəfli məsələlər üzrə real dialoqla zəngin oldu. Onu həmsədrlər Əli Hüseynli və Andrey Yatskin aparırdılar. Müzakirə olunan məsələlər arasında parlamentlərin əməkdaşlığının konkret formaları, iqtisadi-ticari əlaqələr, regionlararası münasibətlər var idi”.
Rusiyalı senator onu da qeyd edib ki, Bakıda keçirilən tədbirdə 2024-cü ildə təşkil ediləcək mühüm tədbirlərə, o cümlədən BRİKS ölkələri parlamentarilərinin görüşləri, habelə Avrasiya Qadın Forumuna hazırlıq məsələləri nəzərdən keçirilib. O əlavə edib: “Görüşdə konstruktiv və tərəflərin Rusiya ilə Azərbaycan arasında münasibətlərin gələcək inkişafına yönəlmiş məsələlərə maraq göstərdikləri ab-hava hökm sürürdü”.
Bölmənin digər xəbərləri
