Rüstəm Minnixanov yenidən Tatarıstanın Rəisi seçilib
Bakı, 15 sentyabr, AZƏRTAC
Rüstəm Minnixanov 88,09 faiz səs toplayaraq Rusiyanın Tatarıstan Respublikasının başçısı seçkilərində qalib gəlib. AZƏRTAC xəbər verir ki, bunu Rusiya Federasiyası Mərkəzi Seçki Komissiyası protokolların sayılması prosesi başa çatdıqdan sonra bəyan edib.
Seçki kampaniyasında 4 namizəd iştirak edib. Regionun rəhbəri postu uğrunda “Vahid Rusiya” partiyası tərəfindən namizədliyi irəli sürülən Minnixanov ilə yanaşı, həmçinin Tatarıstan Dövlət Şurasının deputatı Hafiz Mirqalimov, Vitali Smirnov və “Baylıq №3” şirkətinin direktor müavini Ruslan Yusupov (LDPR) mübarizə aparıblar.
Qeyd edək ki, 68 yaşlı Rüstəm Minnixanov Tatarıstana 2010-cu ildən rəhbərlik edir. O, əvvəllər iki dəfə - 2015 və 2020-ci illərdə bu vəzifəyə seçilib, 2005-2010-cu illərdə isə respublikanın Baş naziri olub.
2023-cü ilin yanvarında Minnixanov Tatarıstan Konstitusiyasına dəyişiklik edən qanunu imzalayıb və bu sənədə görə, bölgə rəhbərinin vəzifəsi “rəis” rəsmi adını alıb.
Bölmənin digər xəbərləri
