Sabirabadda bu mövsüm 3 min tona yaxın sarımsaq istehsal olunub
Sabirabad, 20 iyul, Mahir Babayev, AZƏRTAC
Sabirabadda bu mövsüm 3 min 437 hektar sahədə tərəvəz əkilib ki, bunun da 314 hektarını sarımsaq bitkisi təşkil edib. Təsərrüfatın bu sahəsi gəlirli olduğu üçün rayonda fəaliyyət göstərən fermerlər bu bitkinin əkininə daha çox maraq göstərirlər.
Rayon Statistika İdarəsindən AZƏRTAC-ın bölgə müxbirinə bildiriblər ki, məhsul yığımına vaxtında başlayan torpaq mülkiyyətçiləri qısa müddət ərzində sarımsaq sahələrindən 2 min 949 ton məhsul götürüblər. Əkin sahələrinin hər hektarının məhsuldarlığı 98.3 sentner olub.
Fermer Əli Rəhimov uzun illərdir bu bitkinin əkini ilə məşğul olur və hər il də yaxşı mənfəət götürür. Məhsul istehsalçısı bu il becərdiyi sarımsaq sahəsinin hər hektarından 99 sentner məhsul götürərək 39 ton 400 kiloqram sarımsaq istehsal edib. Torpaq sahibinin dediyinə görə, istehsal etdiyi məhsulu ötən illərdə olduğu kimi bu il də yerli bazarlara çıxaracaq. Təsərrüfat rəhbəri növbəti ildə əkin sahəsini 4.5 hektara çatdırmaq fikrindədir.
Bölmənin digər xəbərləri
