Sabirabadda insan alverinə şərait yaradan səbəblərə dair dəyirmi masa keçirilib
Bakı, 5 may, AZƏRTAC
Əmək və Əhalinin Sosial Müdafiəsi Nazirliyi tabeliyində Sosial Xidmətlər Agentliyinin İnsan Alveri Qurbanlarına Yardım Mərkəzi və Sabirabad Rayon İcra Hakimiyyətinin birgə təşkilatçılığı ilə “Uşaqların təhsildən yayınması və baxımsızlığı insan alverinə şərait yaradan səbəblərdən biri kimi” mövzusunda dəyirmi masa keçirilib.
Agentliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, dəyirmi masada Sabirabad Rayon İcra Hakimiyyətinin nümayəndələri, rayon təhsil müəssisələrinin müəllim və psixoloqları iştirak ediblər.
Agentliyin əməkdaşları İnsan Alveri Qurbanlarına Yardım Mərkəzinin fəaliyyəti və insan alveri qurbanlarına göstərilən yardımlar barədə ətraflı məlumat veriblər. Eləcə də təhsildən yayınan, baxımsız, erkən nikah və məişət zorakılığının qurbanı olan uşaqların gələcəkdə insan alverinin potensial qurbanına çevrilməsi barədə danışılıb.
Sonra iştirakçılar insan alveri hallarının aktuallığını müzakirə ediblər. Həmin halların yaranmasının səbəblərinin araşdırılması, aradan qaldırılmasına yönəlmiş tövsiyələrin, proqramların hazırlanması, maarifləndirmə tədbirlərinin təşkili barədə fikir mübadiləsi aparılıb.
Bölmənin digər xəbərləri
